அதிமுக சார்பில் அமைக்கப்பட்ட கள ஆய்வுக் குழுவுடன் அக்கட்சியின் பொதுச்செயலாளர் எடப்பாடி பழனிசாமி நாளை (நவம்பர் 11)ஆலோசனை மேற்கொள்ள உள்ளார்.
அதிமுகவின் கிளை, வார்டு, நகரம், வட்டம் என அனைத்து நிலையிலான அமைப்புகளையும் ஆராய்ந்து அதனை மேம்படுத்துவதற்காக அதிமுக சார்பில் கள ஆய்வுக் குழு அமைக்கப்பட்டது.
அதிமுக தலைமை அறிவித்த இக்குழுவில் முன்னாள் அமைச்சர்கள் கே.பி.முனுசாமி, திண்டுக்கல் சீனிவாசன், நத்தம் விஸ்வநாதன் உள்ளிட்ட 10 பேர் உறுப்பினர்களாக உள்ளனர். அனைத்து மாவட்டங்களிலும் ஆய்வு நடத்தி டிசம்பர் மாதம் 7-ம் தேதிக்குள் அறிக்கை தாக்கல் செய்ய வேண்டும் என இந்த குழுவுக்கு அதிமுக பொதுச்செயலாளர் எடப்பாடி பழனிசாமி உத்தரவிட்டுள்ளார்.
இந்த ஆய்வுக் குழுவுக்கு முக்கிய அறிவுறுத்தல்களை வழங்குவதற்காக எடப்பாடி பழனிசாமி, நாளை ஆலோசனை நடத்த உள்ளார். சென்னை, ராயப்பேட்டையில் உள்ள அதிமுக தலைமை அலுவலகத்தில் காலை 10 மணிக்கு இந்த கூட்டம் நடைபெற உள்ளதாக அறிவிக்கப்பட்டுள்ளது.
