சென்னையில் நோயாளிக்கு சிகிச்சை அளித்த மற்றொரு அரசு மருத்துவர் மீது தாக்குதல் நடத்தப்பட்ட சம்பவத்தை கண்டித்து பயிற்சி மருத்துவர்கள் போராட்டத்தில் ஈடுபட்டனர்.
சென்னை ராயபுரத்தில் உள்ள ஸ்டான்லி அரசு மருத்துவமனையில் மருத்துவராக பணியாற்றி வருபவர் ஹரிஹரன். இவர் நேற்று பணியில் இருந்தபோது நீலாங்கரை பகுதியைச் சேர்ந்த பதர் என்பவர் புறநோயாளியாக சிகிச்சை பெற வந்துள்ளார். அவருக்கு மருத்துவர் ஹரிஹரன் சிகிச்சை அளித்துக்கொண்டிருந்தபோது, திடீரென அவரது முகத்தில் குத்திய பரத் உடனடியாக அங்கிருந்து தப்பிச் சென்றுள்ளார்.
முகத்தில் லேசான காயமடைந்த மருத்துவர் ஹரிஹரனுக்கு சக ஊழியர்கள் மூலம் உடனடியாக சிகிச்சை அளிக்கப்பட்டது. தொடர்ந்து தாக்குதல் நடத்திவிட்டு தப்பிய நோயாளி பரத் மீது, ஸ்டான்லி அரசு மருத்துவமனை காவல் நிலையத்தில் மருத்துவர் ஹரிஹரன் புகார் அளித்தார்.
இந்நிலையில், தாக்குதல் சம்பவத்தை கண்டித்தும், மருத்துவர்களுக்கு உரிய பாதுகாப்பு வழக்கக்கோரியும், மருத்துவமனை வளாகத்தில் பயிற்சி மருத்துவர்கள் திடீர் போராட்டத்தில் ஈடுபட்டனர். தொடர்ந்து அவர்களுடன் போலீசார் நடத்திய பேச்சுவார்த்தைக்குப் பின் போராட்டம் கைவிடப்பட்டது.
