சென்னையில் ஐடி நிறுவனங்களில் பணிபுரியும் ஊழியர்களை குறிவைத்து மெத்தபெட்டமைன் போதை பொருளை விற்பனை செய்து வந்த ஐடி ஊழியர்கள் இருவர் கைது செய்யப்பட்டுள்ளனர்.
சென்னையில் போதை பொருட்கள் விற்பனையை தடுக்கும் வகையில் தனிப்படை போலீசார், சென்னை வேளச்சேரியில் தீவிர கண்காணிப்பில் ஈடுபட்டனர். அப்போது, தமிழ்நாடு வீட்டு வசதி வாரிய குடியிருப்பு பகுதியை சேர்ந்த ஐடி ஊழியர் ஷாம் சுந்தர், அதே பகுதியில் மெத்தபெட்டமைன் போதை பொருள் விற்பனை செய்யும்போது கையும் களவுமாக பிடிப்பட்டார்.
அவரிடம் தனிப்படை போலீசார் விசாரித்ததில், பாடி பகுதியை சேர்ந்த ஐடி ஊழியர் ஜெகதீஷ் என்பவர், மும்பை, பெங்களூர் பகுதிக்கு சென்று மெத்தபெட்டமைன் வாங்கி வந்து, ஷாம் சுந்தருடன் சேர்ந்து ஐடி ஊழியர்களுக்கு ஒரு கிராம் 3 ஆயிரத்து 500 ரூபாய்க்கு விற்பனை செய்து வந்தது தெரியவந்தது. இதையடுத்து, இருவரையும் கைது செய்த போலீசார், நீதிமன்றத்தில் ஆஜர்படுத்தி சிறையில் அடைத்தனர்.
