பிரான்ஸ் பயணத்தை நிறைவு செய்த பிரதமர் மோடி அமெரிக்கா சென்றடைந்தார்.
பிரதமர் நரேந்திர மோடி அரசுமுறை பயணமாக பிரான்ஸ், அமெரிக்காவுக்கு சுற்றுப்பயணம் மேற்கொண்டுள்ளார். கடந்த 10-ம் தேதி பிரான்ஸ் சென்ற பிரதமர் மோடி அந்நாட்டு தலைநகர் பாரிசில் நடைபெற்ற சர்வதேச செயற்கை நுண்ணறிவு உச்சிமாநாட்டில் பங்கேற்றார். இதையடுத்து பிரான்ஸ் அதிபர் இமானுவேல் மேக்ரானையும் பிரதமர் மோடி சந்தித்தார்.
இந்தச் சந்திப்பின்போது இருநாட்டு உறவு, வர்த்தகம் உள்பட பல்வேறு விவகாரங்கள் குறித்து இருவரும் ஆலோசனை நடத்தினர். இந்நிலையில் பிரான்ஸ் பயணத்தை நிறைவுசெய்த பிரதமர் மோடி மெர்சிலி நகரில் இருந்து விமானம் மூலம் அமெரிக்கா புறப்பட்டுச் சென்றார். விமான நிலையம் சென்ற பிரான்ஸ் அதிபர் மேக்ரான் பிரதமர் மோடியை வழியனுப்பி வைத்தார்.
இந்நிலையில், அமெரிக்கா சென்றடைந்த பிரதமர் மோடியை அதிகாரிகள் வரவேற்றனர். கடும் பனியையும் பொருட்படுத்தாமல் வாஷிங்டனில் திரண்ட இந்திய வம்சாவளியினர் காத்திருந்து பிரதமர் மோடிக்கு வரவேற்பு அளித்தனர்.
