அமெரிக்காவில் படிக்கும் சீன மாணவர்களின் விசா ரத்து செய்யப்படும் என அமெரிக்க வெளியுறவு அமைச்சர் மார்க்கோ ருபியோ தெரிவித்துள்ளார்.
அமெரிக்காவின் மாசாசூசெட்ஸ் மாகாணத்தில் செயல்பட்டு வரும் ஹார்வர்டு பல்கலைக்கழகத்தில் உள்ள சமத்துவம் மற்றும் பன்முக திட்டங்களை நிறுத்துவும், பேராசிரியர்களுக்கான அதிகாரத்தை குறைக்கவும் அதிபர் டிரம்ப் வழிகாட்டுதல்களை பிறப்பித்தார். இதற்கு, பல்கலைக்கழக நிர்வாகம் எதிர்ப்பு தெரிவித்து வழக்கு தொடர்ந்தால், ஹார்வர்டு பல்கலைக்கு வழங்கப்பட்ட வரி விலக்கு சலுகையை டிரம்ப் ரத்து செய்தார்.
மேலும், வெளிநாட்டு மாணவர்களை ஹார்வர்டு பல்கலைக்கழகத்தில் சேர்ப்பதற்கு டிரம்ப் நிர்வாகம் தடை விதித்துள்ளது. இதனிடையே, வெள்ளை மாளிகையில் செய்தியாளர்களிடம் பேசிய அதிபர் டிரம்ப், ஹார்வர்டு பல்கலைக்கழகம் ஒரு பேரழிவாக இருந்து வருகிறது என்றும், 5 பில்லியன் டாலருக்கும் அதிகமான தொகையை நிர்வாகம் எடுத்துக்கொண்டுள்ளதாகவும் குற்றம்சாட்டினார். ஹார்வர்டு மற்றும் அதன் கீழ் வரும் சில உறுப்பு கல்லூரிகள் யூத எதிர்ப்பாளர்களாக செயல்படுவது அம்பலமாகி உள்ளதாகவும் கூறியுள்ளார்.
இதனிடையே, அமெரிக்காவில் படிக்கும் சீன மாணவர்களின் விசா ரத்து செய்யப்படும் என அமெரிக்க வெளியுறவு அமைச்சர் மார்க்கோ ருபியோ தெரிவித்துள்ளார். இதுதொடர்பாக எக்ஸ் பக்கத்தில் அவர் வெளியிட்டுள்ள பதிவில், சீனக் கம்யூனிஸ்ட் கட்சியுடன் தொடர்புடைய மாணவர்களுக்கும், முக்கிய துறைகளில் படிக்கும் மாணவர்களுக்கும் இது பொருந்தும் என மார்க்கோ ருபியோ கூறியுள்ளார்.
