இந்தியாவின் மிக நெருங்கிய நட்பு நாடாகத் தொடக்கம் முதலே ஜப்பான் இருந்து வருகிறது. இரு நாடுகளும் வர்த்தக ரீதியாகவும், கலாச்சார ரீதியாகவும் நெருங்கித் தொடர்பு கொண்டுள்ளன. இந்நிலையில், இரு நாடுகளின் நட்புறவு குறித்து இந்தச் செய்தி தொகுப்பில் பார்க்கலாம்.
ஜப்பான் பிரதமர் ஷிகெரு இஷிபாவின் அழைப்பின் பேரில் பிரதமர் மோடி ஜப்பான் சென்றுள்ளார். இந்தியா, அமெரிக்கா, ஜப்பான், ஆஸ்திரேலியா அகிய நாடுகள் இடம்பெற்றுள்ள ‘குவாட்’ அமைப்பின் எதிர்காலம், பிராந்திய பாதுகாப்பு, வர்த்தகம் உள்ளிட்டவைத் தொடர்பாக விவாதிக்க மோடி ஜப்பான் சென்றுள்ளதாகக் கூறப்படுகிறது. பிரதமராகப் பதவியேற்ற பின் பிரதமர் மோடி ஜப்பானுக்குச் செல்வது இது 8வது முறையாகும்.
அமெரிக்காவின் அதிக வரி விதிப்புக்குப் பின்னான மோடியின் இந்த ஜப்பான் பயணம், இரு நாடுகள் இடையேயான வர்த்தக உறவை மேலும் வலுப்படுத்தும் என எதிர்பார்க்கப்படுகிறது. பல நூற்றாண்டுகளாகவே இந்தியாவுக்கும் ஜப்பானுக்கும் நெருங்கிய உறவு இருந்து வருகிறது. கி.பி. 6ம் நூற்றாண்டில் பௌத்தம் ஜப்பானில் அறிமுகமானது முதல் இந்த உறவு தொடங்குகிறது.
இது குறித்து கருத்து தெரிவித்த அந்நாட்டின் வெளியுறவுத்துறை அமைச்சர், பௌத்தம் வாயிலாக இந்திய கலாச்சாரம் ஜப்பானிய கலாச்சாரத்தில் பெரும் தாக்கத்தை ஏற்படுத்தியுள்ளதாகத் தெரிவித்துள்ளார். ஜப்பான் மக்கள் இந்தியாவுடன் மிகுந்த நட்புடன் இருப்பதற்கு இது முக்கிய காரணம் எனவும் அவர்க் கூறியுள்ளார்.
கலாச்சாரம் மற்றும் பண்பாட்டு ரீதியில் இந்தியாவும் ஜப்பானும் நெருங்கிய தொடர்பு கொண்டுள்ளதற்கு உதாரணமாக, ஜப்பானில் 20 ஆண்டுகளுக்கும் மேலாக “நமஸ்தே இந்தியா” விழா நடைபெற்று வருகிறது.
வர்த்த ரீதியிலும் இந்தியாவின் நெருங்கிய கூட்டாளியாக ஜப்பான் இருந்து வருகிறது. இந்தியாவுடன் அதிகளவில் வர்த்தகம் செய்யும் நாடுகளின் பட்டியலில் ஜப்பான் 17ஆவது இடத்திலும், ஜப்பானுடன் அதிக வர்த்தகம் செய்யும் நாடுகளில் இந்தியா 18ஆவது இடத்திலும் உள்ளன.
2024-25வது நிதியாண்டில் மட்டும் இந்தியா ஜப்பானுடன் ஒரு லட்சத்து 80 ஆயிரம் கோடி ரூபாய் அளவுக்கு வர்த்தகம் செய்துள்ளது. இதில், ஏற்றுமதி 45 ஆயிரம் கோடி ரூபாயாகவும், இறக்குமதி ஒரு லட்சத்து 30 ஆயிரம் கோடி ரூபாயாகவும் உள்ளது.
2015ஆம் ஆண்டு மும்பைக்கும் அகமதாபாத்துக்கும் இடையில் புல்லட் ரயில் பாதையை உருவாக்க இந்தியாவும் ஜப்பானும் ஒப்பந்தமிட்டன.
அதேபோல, 2021ம் ஆண்டு 5G-ஐ மையமாகக் கொண்ட தகவல் தொடர்பு ஒப்பந்தத்தில் கையெழுத்திட்டன. 2022ம் ஆண்டு டெல்லி வந்த ஜப்பான் பிரதமர் ஃபுமியோ கிஷிடா, இந்தியாவில் 42 பில்லியன் டாலர்கள் முதலீடு செய்யும் ஒப்பந்தத்தில் கையெழுத்திட்டார்.
இப்படி, வர்த்தகம் மற்றும் கலாச்சார ரீதியில் இந்தியாவின் மிக நெருங்கிய நட்பு நாடாக ஜப்பான் இருந்து வருகிறது. மோடியின் இந்தப் பயணம் மூலம் இந்த நட்புறவு மேலும் பலப்படும் என எதிர்பார்க்கப்படுகிறது.
