திமுகவுடன் இணைந்து தேமுதிகவும் தோல்வியை சந்திக்கும் என, தவெக கொள்கை பரப்பு பொதுச்செயலாளர் அருண் ராஜ் தெரிவித்துள்ளார்.
தவெக தலைவர் விஜய்யின் தீவிர ஆதரவாளரான முனீஸ்குமார் என்பவரின் இல்லத் திருமண விழா, மதுரை தத்தனேரி அருள்தாஸ்புரத்தில் உள்ள தனியார் திருமண மண்டபத்தில் நடைபெற்றது. இதில், தவெக கொள்கை பரப்புச் பொதுச்செயலாளர் அருண்ராஜ் பங்கேற்று மணமக்களை வாழ்த்தினார். அப்போது மணப்பெண் திடீரென மேடையில் மயங்கி கீழே விழுந்ததால் பரபரப்பு நிலவியது. முதலுதவி சிகிச்சைக்குப்பின் மணப்பெண் இயல்புநிலைக்கு திரும்பினார்.
இதைத்தொடர்ந்து செய்தியாளர்களிடம் பேசிய அருண்ராஜ், திமுக ஆட்சி மீது மக்கள் கடும் கோபத்தில் இருப்பதாகவும், தமிழக மக்கள் 90 சதவீதம் பேர் ஆட்சி மாற்றத்தை எதிர்பார்த்துள்ளதாகவும் தெரிவித்தார். தோல்வி பயத்தில் உள்ள திமுக, தேமுதிகவின் கை கால்களில் விழுந்து தங்கள் கூட்டணிக்கு அழைத்து வந்துள்ளதாகவும், திமுகவுடன் இணைந்து தேமுதிகவும் தோல்வியைச் சந்திக்கும் என்றும் அருண்ராஜ் தெரிவித்தார்.
