FIFA உலகக்கோப்பை கால்பந்து இறுதிப் போட்டியில், அர்ஜென்டினாவை 1-0 என்ற கோல் கணக்கில் வீழ்த்திய ஸ்பெயின் அணி, 16 ஆண்டுகளுக்குப் பிறகு மீண்டும் சாம்பியன் பட்டத்தை கைப்பற்றியுள்ளது.
48 அணிகள் பங்கேற்ற உலகக் கோப்பை கால்பந்து தொடரின் இறுதிப்போட்டி, அமெரிக்காவின் நியூயார்க் – நியூ ஜெர்சி மைதானத்தில் கோலாகலமாக நடைபெற்றது. அர்ஜென்டினா மற்றும் ஸ்பெயின் அணிகள் மோதிய இந்த போட்டியில், தொடக்கம் முதல் இரு அணிகளும் தாக்குதல் ஆட்டத்தை வெளிப்படுத்தியதால், நிர்ணயிக்கப்பட்ட 90 நிமிடங்களில் எந்த அணியும் கோல் அடிக்கவில்லை.
இதையடுத்து ஆட்டம் கூடுதல் நேரத்துக்குச் சென்றது. அப்போது, 106-வது நிமிடத்தில் ஸ்பெயின் அணியின் மாற்று வீரர் ஃபெரான் டோரஸ் அடித்த அற்புதமான கோல் வெற்றியை உறுதி செய்தது. இறுதிவரை அர்ஜென்டினா சமன் செய்ய கடுமையாகப் போராடியபோதிலும், ஸ்பெயின் வீரர்கள் அபாரமான தடுப்பாட்டத்தை வெளிப்படுத்தி கோல் வாய்ப்புகளை முறியடித்தனர்.
இதன் மூலம், அர்ஜென்டினாவை 1-0 என்ற கோல் கணக்கில் வீழ்த்திய ஸ்பெயின் அணி, 2010-ம் ஆண்டுக்குப் பிறகு 16 ஆண்டுகள் கழித்து, 2வது முறையாக உலகக் கோப்பையை வென்று உலக சாம்பியன் பட்டத்தை மீண்டும் கைப்பற்றியது.
முன்னதாக நடைபெற்ற நிறைவு விழாவில் ஆஸ்கர் விருது பெற்ற அமெரிக்க பாடகியும், நடிகையுமான ஜெனிபர் ஹட்சன் அமெரிக்காவின் தேசிய கீதத்தைப் பாடினார். தொடர்ந்து ஹாலிவுட் நடிகர் டாம் குரூஸ், பிரிட்டிஷ் பாப் பாடகர் ராபி வில்லியம்ஸ், அமெரிக்க பாடகியும் நடிகையுமான நிக்கோல் ஷெர்சிங்கர், இத்தாலிய பாடகி லாரா பவுசினி மற்றும் இணையப் பிரபலமான ஐஷோஸ்பீட் ஆகியோர் பங்கேற்ற கலைநிகழ்ச்சிகள் ரசிகர்களை உற்சாகப்படுத்தின.
உலகக்கோப்பை வரலாற்றில் முதல்முறையாக நடைபெற்ற இடைவேளை இசை நிகழ்ச்சியில், அமெரிக்க பாப் இசை நட்சத்திரம் மடோனா, கொலம்பிய பாடகி ஷகிரா, கனடிய பாப் பாடகர் ஜஸ்டின் பீபர், தென் கொரிய கே-பாப் இசைக் குழுவான BTS மற்றும் நைஜீரிய கிராமி விருது பெற்ற பாடகர் பர்னா பாய் ஆகியோர் பங்கேற்றனர்.
அமெரிக்க அதிபர் டொனால்ட் டிரம்ப், FIFA தலைவர் ஜியானி இன்ஃபான்டினோ, ஸ்பெயின் மன்னர் 6-ம் ஃபெலிப்பே, ஸ்பெயின் டென்னிஸ் நட்சத்திரம் கார்லோஸ் அல்கராஸ், அமெரிக்க டென்னிஸ் ஜாம்பவான் செரீனா வில்லியம்ஸ், அமெரிக்க பாப் இசைப் பாடகி பியான்சே மற்றும் அமெரிக்க ராப்பர் ஜே-ஸி உள்ளிட்ட பல்வேறு உலகப் பிரபலங்களும் போட்டியை நேரில் கண்டு ரசித்தனர்.
