உத்தரப் பிரதேசத்தின் காசியாபாத்தில் உள்ள ஹிண்டன் விமானப்படை தளத்தில், இந்திய விமானப்படை தினம் வெகுவிமரிசையாக கொண்டாடப்பட்டது.
இந்த விழாவில்,
விமானப்படையின் வலிமையை வெளிப்படுத்தும் வகையில், ஹெலிகாப்டர்கள், போர் விமானங்கள், ஏவுகணைகள் மற்றும் வான் பாதுகாப்பு அமைப்புகள் காட்சிப்படுத்தப்பட்டன. மேலும், பெண் வீராங்கனைகள் பங்கேற்ற சிறப்பு துப்பாக்கி சாகச அணிவகுப்பும் நடைபெற்றது.
மிகவும் பழமையான டைகர் மோத்(Tiger Moth) சிறிய ரக விமானம் அனைவரின் கவனத்தையும் ஈர்த்தது. இந்திய விமானப்படையின் நீண்டகால விமானப் பாரம்பரியத்தை நினைவூட்டும் வகையில் டைகர் மோத் விமானம் வானில் பறந்ததை பார்வையாளர்கள் கண்டு ரசித்தனர்.
நிகழ்ச்சியில் பேசிய இந்திய விமானப்படை தளபதி ஏ.பி.சிங் இந்திய விமானப்படை 94 ஆண்டுகளில் சிறந்த மற்றும் நவீன திறன் கொண்ட படையாக வளர்ந்துள்ளதாகவும், எந்த சவாலையும் எதிர்கொள்ள விமானப்படை தயாராகவும், விழிப்புடனும் உள்ளதாகவும் கூறினார். உலகின் பல்வேறு பகுதிகளில் நடைபெறும் மோதல்கள், ஒரு நாட்டின் பாதுகாப்பில் விமானப்படையின் முக்கியத்துவத்தை எடுத்துக்காட்டுவதாகவும் அவர் குறிப்பிட்டார்.
