இந்தியா எல்லைக்கு உட்பட்ட லடாக் பகுதியில் உயரமான சாலைகள், சுரங்கம் மற்றும் விமான தளம் அமைக்க இந்தியா தீவிரமாக உள்ளது.
இந்திய – சீன எல்லைப் பகுதியான கிழக்கு லடாக்கில் உலகிலேயே உயரமான சாலைகள், நீளமான சுரங்கப்பாதை மற்றும் சிறந்த இராணுவ விமான தளம் அமைக்க உள்ளது. இது குறித்து எல்லை சாலைகள் அமைப்பு (Border Roads Organisation) தலைவர் லெப்டினன்ட் ஜெனரல் ராஜீவ் சவுத்ரி கூறியதாவது, “கடந்த 2017ம் ஆண்டு உம்லிங் லா பாஸ் உள்ள சாலையை எல்லை சாலைகள் அமைப்பு மக்களின் பயன்பாட்டுக்குக் கொண்டு வந்தது. இந்த சாலை உலகிலேயே மிகவும் உயரமான சாலை (19024 அடி) என்று கின்னஸ் சாதனை படைத்தது.
அந்த சாதனையை முறியடிக்கும் விதமாகக் கிழக்கு லடாக்கில் டெம்சாக் செக்டார் பகுதியில் உள்ள பக்சே- மிக் லா இடையே அமையும் சாலை, உலகின் மிக உயரமான சாலை என்ற புதிய சாதனையைப் படைக்கும்.
கடந்த ஆகஸ்ட் 15 ம் தேதி இந்த சாலை அமைக்கும் பணியை, எல்லை சாலைகள் அமைப்பு தொடங்கியது. 19400 அடி உயரமாக அமையும் இந்த சாலை மூலம் எல்லைப்பகுதியில் சிக்கலான சூழ்நிலை ஏற்பட்டாலும், அப்போது ஆயுதப்படைகளை அந்த பகுதிக்குத் துரிதமாக அனுப்ப இந்த சாலை உதவும்.
மேலும், உலகின் உயரமான சுரங்கப்பாதையாக ‛சிலா சுரங்கப்பாதை அமைய இருக்கிறது. இரு வழிப்பாதையாக அமைந்துள்ள இந்த சுரங்கப்பாதையை, பிரதமர் மோடி விரைவில் திறந்து வைக்க உள்ளார். அடுத்ததாக ஹிமாச்சல பிரதேசத்தின் மணாலியை, லடாக்கின் ஜன்ஸ்கர் வழியாக லே பகுதி வரை இணைக்கும் ஷின்கு லா சுரங்கப்பாதை அமைக்கும் பணியையும் தொடங்க உள்ளது. இது உலகின் உயரமான சுரங்கப்பாதையாக அமையும்.
மேலும், போர் விமானங்கள் வந்து செல்லும் வகையில் “நயோமா விமானப் படைத் தளம்” அமைகிறது. கிழக்கு லடாக்கிலிருந்து 30 கி.மீ., தொலைவில் அமையும் இந்த விமானப் படைத் தளம் அடுத்தாண்டு டிசம்பர் மாதத்திற்குள் முடிவடையும்.” எனக் கூறினார்.
