மத்திய அரசின் டிஜிட்டல் இந்தியா திட்டத்தின் மூலம் ஊழல் தடுக்கப்பட்டிருக்கிறது என்று தமிழக ஆளுநர் ஆர்.என்.ரவி தெரிவித்திருக்கிறார்.
திருச்சி இந்திய மேலாண்மைக் கழகத்தில் (ஐ.ஐ.எம்.) தலைமைத்துவம் குறித்த கருத்தரங்கு இன்று நடைபெற்றது. போட்டி நிறைந்த இந்த உலகத்தில் தலைமைத்துவத்துடன் சிறந்து விளங்குவதற்குத் தேவைப்படும் புதிய திறன்கள் மற்றும் பரிணாமங்கள் குறித்த கருப்பொருளில் இக்கருத்தரங்கம் நடைபெற்றது. இக்கருத்தரங்கத்தில் தலைமை விருந்தினராகக் கலந்துகொண்டு பேசிய தமிழக ஆளுநர் ஆர்.என்.ரவி, “சிறந்த தலைவர்கள் மாற்றத்திற்காக காத்திருக்க மாட்டார்கள். அவர்கள் மாற்றத்தை ஏற்படுத்துவார்கள்.
இந்தியாவில் ஊழல் ஒரு மிகப்பெரும் பிரச்சனையாக உள்ளது. ஒரு ரூபாய் அரசு ஒதுக்கினால், பயனாளிகளுக்கு 15 பைசா மட்டும்தான் சென்றடைகிறது. மீதமுள்ள 85 பைசாவை ஊழல் செய்கிறார்கள். இதற்கான தீர்வாகத்தான் ‘டிஜிட்டல் இந்தியா’ கொண்டு வரப்பட்டுள்ளது. இந்தியாவில் 5 மில்லியன் ஜந்தன் வங்கிக் கணக்குகள் உள்ளன. இதில் 56 சதவிகிதம் பேர் பெண்கள் இருக்கிறார்கள். இவர்களது வங்கிக் கணக்கிற்கு நேரடியாக பணம் சென்றுவிடுவதால், இடையில் இருப்பவர்கள் முறைகேடு செய்ய முடிவதில்லை.
முத்ரா திட்டத்தின் மூலம் நாடு முழுவதும் 27 லட்சம் கோடி ரூபாய் கடன் வழங்கப்பட்டுள்ளது. இதன் மூலம் ஏழை, எளிய மக்கள் பலரும் தொழில் தொடங்க வழிவகை செய்யப்பட்டுள்ளது. மத்திய அரசு 5 ஆண்டுகளுக்கான தொலைநோக்கு திட்டங்களை தீட்டி செயல்படுகிறது. இதனால்தான் பல மருத்துவமனைகள், சாலைகள் உள்ளிட்டவை அமைக்கப்பட்டு நாடு மேம்பாடு அடைகிறது. சமீபத்தில் நடந்த ஒரு நிகழ்வில், தமிழகத்தில் பள்ளிக்கல்வி படிக்கும் கிராமப்புறத்தைச் சேர்ந்த ஒரு மாணவர், சூரியசக்தி மூலம் இஸ்திரி செய்யும் பெட்டியை கண்டுபிடித்திருக்கிறார். இதன் மூலம், பல டன் கரி சேமிக்கப்படும். சுற்றுச்சூழல் மாசு தவிர்க்கப்படும். அந்த மாணவனை நான் பாராட்டினேன். இதேபோல மாணவர்கள் புதுப்புது கருவிகளை கண்டுபிடிக்க வேண்டும்” என்று கூறினார்.
