“ஸ்மைல் ப்ளீஸ்”: நிலவில் ரோவர் எடுத்த லேண்டர் புகைப்படம்!

நிலவில் ஆராய்ச்சியில் ஈடுபட்டிருக்கும் ரோவர், தன்னைச் சுமந்து வந்த லேண்டரை புகைப்படம் எடுத்து அனுப்பி இருக்கிறது. இதற்கு “ஸ்மைல் ப்ளீஸ்” என்று தலைப்புக் கொடுத்து இஸ்ரோ வெளியிட்டிருக்கிறது.

நிலவின் தென்துருவத்தை ஆய்வு செய்வதற்காக, சந்திரயான்-3 விண்கலத்தை கடந்த ஜூலை மாதம் 14-ம் தேதி இந்தியா விண்ணில் செலுத்தியது. 40 நாட்கள் பயணத்துக்குப் பிறகு, கடந்த 23-ம் தேதி மாலை 6.04 மணிக்கு லேண்டர் வெற்றிகரமாகத் தரையிறக்கப்பட்டது.

சிறிது நேரத்தில் லேண்டரில் இருந்து வெளியே வந்த பிரக்ஞான் ரோவர், நிலவில் இறங்கி தனது ஆராய்ச்சியைத் தொடங்கி இருக்கிறது. முதலில் நிலவின் மேற்பரப்பில் பயணித்தவாறே ஆய்வில் ஈடுபட்ட ரோவர், பின்னர் நிலவில் சுமார் 10 செ.மீ. ஆழத்துக்கு துளையிட்டு சோதனை செய்தது.

அதேபோல, தனது பயணத்தின்போது வழியில் 4 மீட்டர் விட்டம் கொண்ட பள்ளத்தைப் பார்த்து திகைத்த ரோவர், பிறகு தனது பாதையை மாற்றி பயணித்து வருகிறது. அந்த வகையில், தனது சோதனையின் ஒரு பகுதியாக நிலவில் கந்தகம் இருப்பதைக் கண்டுபிடித்து தகவல் அனுப்பியது.

மேலும், இஸ்ரோ மையத்துக்கு ரோவர் அனுப்பிய தகவலில், “நான் சந்திரனின் ரகசியங்களை வெளிக்கொணரப் போகிறேன் என்பதை அனைவருக்கும் தெரியப்படுத்த விரும்புகிறேன். நானும் எனது நண்பர் விக்ரம் லேண்டரும் நல்ல ஆரோக்கியத்துடன் இருக்கிறோம். சிறந்தவை விரைவில் வரும்” என்று தெரிவித்திருந்தது.

Chandrayaan-3 Mission:

Smile, please📸!

Pragyan Rover clicked an image of Vikram Lander this morning.

The 'image of the mission' was taken by the Navigation Camera onboard the Rover (NavCam).

NavCams for the Chandrayaan-3 Mission are developed by the Laboratory for… pic.twitter.com/Oece2bi6zE

— ISRO (@isro) August 30, 2023

அதேபோல, தனது பயணத்தின்போது கண்ணில் படும் காட்சிகளை எல்லாம் புகைப்படங்கள் எடுத்து அனுப்பி வருகிறது ரோவர். அந்த வகையில், தனது நண்பரான விக்ரம் லேண்டரை, ரோவர் புகைப்படம் எடுத்து அனுப்பி இருக்கிறது.

இந்த புகைப்படத்தை “ஸ்மைல் ப்ளீஸ்” என்று தலைப்பிட்டு இஸ்ரோ தனது எக்ஸ் பக்கத்தில் வெளியிட்டிருக்கிறது. அப்பதிவில், “பிரக்யான் ரோவர், விக்ரம் லேண்டரை புகைப்படம் எடுத்து அனுப்பி இருக்கிறது. ரோவரில் உள்ள நேவிகேஷன் கேமரா மூலம் இந்த புகைப்படம் எடுக்கப்பட்டிருக்கிறது.

சந்திரயான்-3 விண்கலத்தில் பொருத்தப்பட்டிருக்கும் நேவிகேஷன் கேமராவானது எலெக்ட்ரோ ஆப்டிக்ஸ் சிஸ்டம்ஸ் ஆய்வுக் கூடத்தில் தயாரிக்கப்பட்டது” என்று தெரிவிக்கப்பட்டிருக்கிறது.