ஆசியான் நாடுகளுடனான இந்தியாவின் உறவு 40 ஆண்டுகளைக் கடந்தும் நீடிக்கிறது. சர்வதேச அளவிலான வளர்ச்சிக்கு ஆசியான் அமைப்பு மிக முக்கியப் பங்கு வகிக்கிறது. ஆசியான் மாநாட்டில் பங்கேற்பது மிகுந்த பெருமை அளிக்கிறது என்று பாரதப் பிரதமர் நரேந்திர மோடி கூறியிருக்கிறார்.
ஆசியான் இந்தியா மாநாடு மற்றும் கிழக்கு ஆசிய நாடுகளின் உச்சி மாநாடு ஆகியவை இந்தோனேஷிய தலைநகர் ஜகார்தாவில் இன்று நடைபெற்று வருகிறது. இம்மாநாடுகளில் பங்கேற்குமாறு அந்நாட்டு அதிபர் ஜோகோ விடோடோ, பாரதப் பிரதமர் மோடிக்கு அழைப்பு விடுத்திருந்தார். இதையடுத்து, பிரதமர் மோடி, நேற்று இரவு 8 மணியளவில் இந்தோனேஷியாவுக்குப் புறப்பட்டுச் சென்றார். இன்று காலை 4 மணியளவில் ஜகார்த்தாவை சென்றடைந்த பிரதமர் மோடிக்கு உற்சாக வரவேற்பு அளிக்கப்பட்டது.
தொடர்ந்து, பிரதமர் மோடிக்கு இந்தோனேஷியா வாழ் இந்தியர்கள் உற்சாக வரவேற்பு அளித்தனர். பின்னர், சிறிது நேர ஓய்வுக்குப் பிறகு, காலை 7 மணியளவில் நடந்த ஆசியான் இந்தியா மாநாட்டில் பிரதமர் மோடி கலந்துகொண்டார். அப்போது அவர் பேசுகையில், “இந்தாண்டுக்கான கருப்பொருள் ஆசியான் வளர்ச்சியின் மையம் என்பதாகும். ஆசியான் அமைப்பு மிகவும் முக்கியத்துவம் வாய்ந்தது. ஏனெனில், இங்கு அனைவரின் குரலும் கேட்கப்படுகின்றன. ஆசியான் வளர்ச்சியின் மையமாக விளங்குகிறது. சர்வதேச அளவிலான வளர்ச்சியில் ஆசியான் மிக முக்கிய பங்கு வகிக்கிறது.
ஆசியான் நாடுகளுடனான இந்தியாவின் உறவு 40 ஆண்டுகளைக் கடந்தும் நீடிக்கிறது. ஆகவே, ஆசியான் மாநாட்டில் பங்கேற்பது மிகுந்த பெருமை அளிக்கிறது. ஆசியான் அமைப்பிலுள்ள பிற நாடுகளுக்கு இந்தியா எப்போதும் உதவி வருகிறது. கடந்தாண்டு நாங்கள் இந்தியா ஆசியான் நட்பு தினத்தை கொண்டாடி , ஒரு விரிவான மூலோபாய கூட்டாண்மையை வழங்கினோம். நமது வரலாறும், இந்தியாவையும் ஆசியாவையும் இணைக்கின்றன. குறிப்பாக, அமைதி, செழிப்பு மற்றும் நம்பிக்கை ஆகியவை நம்மை ஒன்றிணைக்கிறது.
அந்த அடிப்படையில் இந்த உச்சிமாநாட்டை ஏற்பாடு செய்ததற்காக இந்தோனேசிய அதிபர் ஜோகோ விடோடோவை நான் வாழ்த்துக்கிறேன். இந்தியாவின் கிழக்குக் கொள்கையின் மையப் புள்ளியாக ஆசியான் திகழ்கிறது. மேலும், இந்தியாவின் இந்தோ-பசிபிக் முன்முயற்சியிலும் இந்தப் பகுதி முக்கியப் பங்கு வகிக்கும். உலக நிச்சயமற்ற சூழலில் கூட, ஒவ்வொரு துறையிலும் நமது பரஸ்பர ஒத்துழைப்பு சீராக முன்னேறி வருகிறது” என்று பிரதமர் மோடி பேசினார்.
