பல ஆண்டுகளாக ஜி20 என்று இருந்த அமைப்பை, தற்போது நமது பிரதமர் நரேந்திர மோடி ஜி21 ஆக மாற்றி இருக்கிறார். குறிப்பாக, அதிக மக்கள்தொகை கொண்ட ஆப்பிரிக்க யூனியனை ஜி20 அமைப்பிற்குள் நிரந்தர உறுப்பினராகக் கொண்டு வந்து ஜி21 ஆக மாற்றிய பெருமை நமது பிரதமரையே சாரும் என்று தமிழக பா.ஜ.க. தலைவர் அண்ணாமலை கூறியிருக்கிறார்.
சென்னை விமான நிலையத்தில் தமிழக மாநில பா.ஜ.க. தலைவர் அண்ணாமலை செய்தியாளர்களுக்கு அளித்த பேட்டியில், “டெல்லியில் இந்தியா தலைமையில் நடக்கக் கூடிய ஜி20 மாநாடு மிகப்பெரிய சரித்திரம் படைத்துள்ளது. குறிப்பாக, பிரதமர் மோடி உலக அளவில் முன்னிறுத்தக் கூடிய குறிக்கோள்கள் உலக மக்களுக்குத் தெரியும். நிறைய பிரச்சனைகள் இருக்கக்கூடிய உலகமாக இருக்கிறது.
பொருளாதார பிரச்சனைகள், நாடுகளுக்குள் இருக்கக்கூடிய யுத்தங்கள் உள்ளிட்ட அனைத்து விஷயங்களும் ஜி20 அரங்கில் நமது பிரதமர் நரேந்திர மோடி தலைமையில் ஆலோசனை மேற்கொள்ளப்பட்டுள்ளது. இத்தனை ஆண்டுகளாக ஜி20 இருந்தது. ஆனால், அதை ஜி21 ஆக பிரதமர் நரேந்திர மோடி மாற்றியுள்ளார். குறிப்பாக, அதிக மக்கள்தொகை கொண்ட ஆப்பிரிக்க யூனியனை ஜி20 அமைப்புக்குள் நிரந்தர உறுப்பினராகக் கொண்டு வந்து சாதனை படைத்துள்ளார்.
கடந்த 9 ஆண்டுகளாக பிரதமர் மோடி முன்னிறுத்தக் கூடிய விஷயங்களை, உலக அளவில் கொண்டு சென்றுள்ளார். ஜி20 மாநாட்டில் சிறுதானியங்களின் முக்கியத்துவம் குறித்த அறிக்கையை வெளியிட்டுள்ளார். வாழ்க்கையின் மாற்றம், பழக்க வழக்கம், யோகா கலை, சாப்பிடும் முறை ஆகியவற்றில் பெரிய முன்னேற்றத்தைக் கொண்டு வர முடியும் எனப் பிரதமர் கூறியுள்ளார். உலக அரங்கில் இந்தியா தலைமையில் அனைத்து நாடுகளையும் ஒருங்கிணைத்து அனைவரும் ஏற்றுக் கொள்ளக்கூடிய ஒரு நாடாக நமது பிரதமர் மோடி ஏற்படுத்தி இருக்கிறார்.
பிரதமர் மோடியின் திட்டங்களை, அமெரிக்க அதிபர், இங்கிலாந்து அதிபர் போன்ற முக்கியமான தலைவர்களுடன் பாராட்டியுள்ளனர். சீனா உலகின் தென்பகுதியில் தலையில் சிறந்த நாடாக இருக்க வேண்டும் என்ற எண்ணத்தில் அருகில் உள்ள சிறிய நாடுகளுக்கு கடன் கொடுத்து அவற்றை தன் நாட்டிற்குக் கீழ் கொண்டு வரும் நிலையை ஏற்படுத்தியது. ஆனால், இந்தியாவைப் பொறுத்தவரை வளரும் சிறிய நாடுகளுக்குத் தேவையான உதவிகளைச் செய்து அவர்களின் வளர்ச்சிக்கும் உதவுகிறது. இது தென் பிராந்தியத்தில் மிகப்பெரிய மாற்றத்தை ஏற்படுத்தியுள்ளது.
ஒட்டுமொத்தமாக ஓராண்டு காலமாக இந்தியாவின் ஜி20 தலைமை மக்களை முன்னிறுத்தி நடந்து வருகிறது. குறிப்பாக, நமது அரசு 220 கூட்டங்கள் நடத்தியுள்ளது. 64 மாநகரத்தில் நடைபெற்றுள்ளது. காஞ்சிபுரம், மகாபலிபுரம், சென்னை போன்ற எல்லா நகரங்களிலும் ஜி20 மாநாடு நடைபெற்றுள்ளது. மற்ற நாடுகளில் ஜி20 நடக்கும்போது, நாட்டின் தலைநகரில் மட்டுமே நடைபெறும். ஆனால், இந்தியாவைப் பொறுத்தவரை நாட்டின் அனைத்து பகுதிகளிலும் நடைபெற்று உள்ளது. கிட்டத்தட்ட ஒரு லட்சத்திற்கும் மேற்பட்ட வெளிநாட்டு அதிகாரிகள் இந்தியா வந்துள்ளனர்.
நமது நாடு தலைமை ஏற்ற பிறகு, ஜி20 மிகப் பெரிய அளவிற்குக் கொண்டு செல்லப்பட்டுள்ளது. ஜி20 மாநாடு நடக்கும் பாரத் மண்டபத்தில் தமிழகத்தில் செய்த நடராஜர் சிலையை நிறுவி நமது கலாச்சாரத்தைப் பிரபத்தி பலிக்கும் வகையில் பிரதமர் செயல்படுத்தியுள்ளார். இது தமிழர்களுக்கு மிகப்பெரிய பெருமை. அதுவும் குறிப்பாக சுவாமி மலையில் பல ஆண்டுகளாகச் சிலை வடிக்கும் குடும்பத்தின் மூலம் இந்த சிலை செய்யப்பட்டுள்ளது. உலக அரங்கில் இந்தியாதான் மையப் புள்ளி என்பதை முன்னிறுத்தி உள்ளோம். சீனாவிற்கு மாற்றாக இந்தியா வளர்ச்சி அடைகின்ற நாடாகவும், வளராத நாடுகளுக்கு முன் உதாரணமாகவும் இருக்கும்” என்றார்.
