சீன அதிபர் ஜி ஜின் பிங்கைவிட பாரதப் பிரதமர் நரேந்திர மோடி தொலைநோக்குப் பார்வை கொண்டவர் என்று லண்டன் நகரைச் சேர்ந்த பிரபல பொருளாதார நிபுணர் ஜிம் ஓ நீல் புகழாரம் சூட்டி இருக்கிறார். மேலும், ஜி20 உச்சி மாநாட்டின் டெல்லி கூட்டுப் பிரகடனம் மூலம், உலகளாவிய பிரச்சனைகளுக்கு உண்மையான, உலகளாவிய தீர்வுகளை வழங்குவதற்கான நோக்கம் மற்றும் சட்டபூர்வமான ஒரே அமைப்பு ஜி20 மட்டுமே என்பதை மீண்டும் உறுதிப்படுத்தி இருக்கிறது என்றும் கூறியிருக்கிறார்.
தென்னாப்பிரிக்காவின் ஜோகன்னஸ்பர்க் நகரில் சமீபத்தில் “பிரிக்ஸ்” உச்சி மாநாடு நடந்தது. தொடர்ந்து, டெல்லியில் ஜி20 உச்சி மாநாடு நடந்தது. இந்த இரு மாநாடுகளிலும் ஆதிக்கம் செலுத்தியது பாரதப் பிரதமர் நரேந்திர மோடிதான். இந்த நிலையில், பிரிக்ஸ் உச்சி மாநாடு மற்றும் ஜி20 உச்சி மாநாடு குறித்த தனது நிலைப்பாட்டை லண்டனைச் சேர்ந்த பிரபல பொருளாதார நிபுணர் ஜிம் ஓ நீல் வெளிப்படுத்தி இருக்கிறார்.
இதுகுறித்து ஜிம் ஓ நீல் தனது சமூக வலைத்தளப் பக்கத்தில் வெளியிட்டிருக்கும் பதிவில், “இந்தியா, சீனா ஒற்றுமை இல்லாதது, புதிய “பிரிக்ஸ்” அமைப்பிற்கு பெரும் முட்டுக்கட்டையாக இருக்கும். தற்போது, ஜி20 உச்சி மாநாட்டில் சீன அதிபர் ஜி ஜின் பிங் கலந்துகொள்ளாதது இரு நாடுகளுக்கு இடையேயான பிளவை ஆழப்படுத்தி இருக்கிறது. மேலும், ஜி ஜின் பிங் எங்களை வேறுவிதமாக சமாதானப்படுத்த விரும்பினால், அதற்காக அவர் மோடியை அணுக வேண்டிய அவசியம் ஏற்படும்.
ஜி20 மாநாட்டின் வெற்றி, மோடியை உலக அளவில் தெளிவான வெற்றியாளராக மாற்றி இருக்கிறது. ஜி20 உச்சி மாநாட்டின் டெல்லி கூட்டுப் பிரகடனம் மூலம், உலகளாவிய பிரச்சனைகளுக்கு உண்மையான, உலகளாவிய தீர்வுகளை வழங்குவதற்கான நோக்கம் மற்றும் சட்டபூர்வமான ஒரே அமைப்பு ஜி20 மட்டுமே என்பதை மீண்டும் உறுதிப்படுத்தி இருக்கிறது. உணர்வுகள் மிகவும் முக்கியம். தற்போது மோடி, ஜி ஜின் பிங்கைவிட ஒரு தொலைநோக்குப் பார்வை கொண்ட அரசியல்வாதி போல் இருக்கிறார்.
அதேபோல, ஜி20 மற்றொரு நுட்பமான, முக்கியமான நிலையை அடைந்திருக்கிறது. அதுதான் ஆப்பிரிக்க யூனியனைச் சேர்க்க ஒப்புக்கொண்டது. இந்த சாதனையின் மூலம் ஜி20 அமைப்பை ஜி21 அமைப்பாக மாற்றியதை நாம் மறந்துவிட கூடாது. இந்த முன்னேற்றம் மோடிக்கு தெளிவான இராஜதந்திர வெற்றியை அளிக்கிறது. இது உலகளாவிய தெற்கின் சாம்பியனாக மோடியின் செல்வாக்கை உயர்த்த அனுமதிக்கிறது. எகிப்து மற்றும் எத்தியோப்பியாவை உள்ளடக்கிய பிரிக்ஸ் அமைப்பு விரிவாக்கத்தின் சீரற்ற தன்மையை இது மேலும் அடிக்கோடிட்டுக் காட்டுகிறது” என்று புகழாரம் சூட்டி இருக்கிறார்.
