நவராத்திரி விழாவை முன்னிட்டு, கடந்த சில வருடங்களுக்கு முன்பு பிரதமர் நரேந்திர மோடி எழுதிய “கர்பா” பாடல், இசை வீடியோவாக இன்று வெளியிடப்பட்டிருக்கிறது. இந்த வீடியோ வெளியான 3 மணி நேரத்தில் 2.40 லட்சம் பார்வையாளர்களைக் கடந்திருக்கிறது.
இந்தியாவின் பல்வேறு மாநிலங்களில் மிகவும் பிரபலமாகவும், பரவலாகவும் கொண்டாடப்படும் இந்து பண்டிகைகளில் நவராத்திரி விழாவும் ஒன்றாகும். ராஸ் கர்பா இசையில், பகவான் கிருஷ்ணர் மற்றும் கோபியர்களுக்கு இடையேயான உறவுகளின் கதைகள் மற்றும் உணர்ச்சிகளை இவ்விழா பிரதிபலிக்கிறது. இவ்விழா குஜராத் மாநிலத்தில் தொடர்ந்து 9 இரவுகள் கொண்டாடப்படுகிறது. மாநிலத்தின் கிராமங்கள் மற்றும் நகரங்களில் உள்ள மக்கள் திறந்த வெளிகளில் கூடி இவ்விழாவைக் கொண்டாடுகிறார்கள்.
கடந்த சில வருடங்களுக்கு முன்பு பாரதப் பிரதமர் நரேந்திர மோடி “கர்பா” பாடல் ஒன்றை எழுதினார். இந்தப் பாடல் தற்போது, ‘கார்போ’ என்கிற தலைப்பில், பாடகி த்வானி பானுஷாலி குரலில், தனிஷ்க் பாக்சி இசையமைப்பில், நடிகரும் தயாரிப்பாளருமான ஜாக்கி பாக்னானியால் நிறுவப்பட்ட ஜஸ்ட் மியூசிக் என்ற இசை லேபிளின் கீழ் வீடியோவாக வெளியிடப்பட்டிருக்கிறது. 3 நிமிடம் 10 வினாடிகள் கொண்ட இந்த வீடியோ, வெளியிடப்பட்ட 3 மணி நேரத்தில் 2.40 லட்சம் பார்வையாளர்களைக் கடந்திருக்கிறது.
இந்தப் பாடல் அடங்கிய வீடியோவை பிரதமர் மோடியை டேக் செய்து தனது எக்ஸ் பக்கத்தில் வெளியிட்டிருக்கும் பாடகி த்வானி பானுஷாலி, “பிரதமர் மோடியால் எழுதப்பட்ட இந்த கர்பா பாடலை இசையமைப்பாளர் தனிஷ்க் பாக்சியும், நானும் மிகவும் ரசித்தோம். இதேபோல புதிய தாளம், அமைப்பு மற்றும் சுவையுடன் ஒரு பாடலை உருவாக்க விரும்புகிறோம். இந்தப் பாடலையும் வீடியோவையும் வெளியிட்டு எங்களுக்கு வாழ்க்கையை உயிர்ப்பிக்க உதவிய இசை லேபிளுக்கு நன்றி” என்று கூறியிக்கிறார்.
இதற்கு தனது எக்ஸ் பக்கத்தில் பதிலளித்திருக்கும் பிரதமர் மோடி, “இப்பாடல் நான் கடந்த சில ஆண்டுகளுக்கு முன்பு எழுதியது. இது பல நினைவுகளைத் திரும்பக் கொண்டு வருகிறது. பல ஆண்டுகளாக நான் எழுதவில்லை. ஆனால், கடந்த சில நாட்களாக என்னால் ஒரு புதிய கர்பாவை எழுத முடிந்தது. அதை நவராத்திரியின்போது பகிர்ந்து கொள்கிறேன்” என்று தெரிவித்திருக்கிறார்.
Thank you @dhvanivinod, Tanishk Bagchi and the team of @Jjust_Music for this lovely rendition of a Garba I had penned years ago! It does bring back many memories. I have not written for many years now but I did manage to write a new Garba over the last few days, which I will… https://t.co/WAALGzAfnc
— Narendra Modi (@narendramodi) October 14, 2023
