காசா மருத்துவமனை மீதான தாக்குதலுக்கு பிரதமர் நரேந்திர மோடி கண்டனம்!

காசா மருத்துவமனை மீதான தாக்குதலுக்கு பிரதமர் நரேந்திர மோடி கண்டனம் தெரிவித்துள்ளார்.

கடந்த 7ஆம் தேதி இஸ்ரேல் மீது ஹமாஸ் இயக்கம் தாக்குதல் நடத்தியது. இதற்கு பதிலடி தரும் வகையில் காசா நகர் மீது இஸ்ரேல் தொடர் தாக்குதல் நடத்தி வருகிறது. இந்நிலையில், அல்-அஹ்லி மருத்துவமனை மீது நேற்று ஏராளமான பொதுமக்கள் குவிந்திருந்தபோது வான்வழித்தாக்குதல் நடத்தப்பட்டது. இதில் சுமார் 500 பேர் பலியானார்கள்.

மருத்துவமனை மீது இஸ்ரேல் வான்வழித்தாக்குதல் நடத்தியதாக பாலஸ்தீன அரசு குற்றம்சாட்டியுள்ளது. காசாவில் செயல்பட்டுவரும் பாலஸ்தீனியன் இஸ்லாமிக் ஜிகாத் ஆயுதக்குழு ஏவிய ஏவுகணையே காசா மருத்துவமனை மீது விழுந்ததாக இஸ்ரேல் ராணுவம் தெரிவித்துள்ளது.

Deeply shocked at the tragic loss of lives at the Al Ahli Hospital in Gaza. Our heartfelt condolences to the families of the victims, and prayers for speedy recovery of those injured.

Civilian casualties in the ongoing conflict are a matter of serious and continuing concern.…

— Narendra Modi (@narendramodi) October 18, 2023

இந்நிலையில் மருத்துவமனை மீதான தாக்குதலுக்கு பிரதமர் மோடி கடும் கண்டனம் தெரிவித்துள்ளார். இதுதொடர்பாக எக்ஸ் தளத்தில் அவர் விடுத்துள்ள பதிவில், காசாவில் உள்ள அல் அஹ்லி மருத்துவமனையில் நடத்தப்பட்ட தாக்குதல் அதிர்ச்சியை ஏற்படுத்தியுள்ளதாக தெரிவித்துள்ளார்.

உயிரிழந்தவர்களின் குடும்பத்தினருக்கு ஆழ்ந்த இரங்கலையும், காயமடைந்தவர்கள் விரைவில் குணமடைய பிரார்த்திப்பதாகவும் அவர் கூறியுள்ளார். பொதுமக்கள் உயிரிழப்பது கவலைக்குரிய விஷயம் என்றும், இதற்கு சம்பந்தப்பட்டவர்கள் பொறுப்பேற்க வேண்டும் என்றும் பிரதமர் நரேந்திர மோடி கூறியுள்ளார்.