மத்திய அரசு ஊழியர்களுக்கான அகவிலைப்படி மற்றும் ஓய்வூதியம் பெறுபவர்களுக்கான அகவிலைப்படியை 4 சதவீதம் உயர்த்த மத்திய அமைச்சரவை இன்று ஒப்புதல் அளித்திருக்கிறது.
மத்திய அரசு ஊழியர்களுக்கான அகவிலைப்படியை, மத்தியில் ஆட்சி செய்யும் அரசுகள் அவ்வப்போது உயர்த்தி வருகின்றன. அந்த வகையில், தற்போது பா.ஜ.க. தலைமையிலான மத்திய அரசு, 4 சதவீதம் அகவிலைப்படியை உயர்த்தி இருக்கிறது. இதன் மூலம், மத்திய அரசு ஊழியர்களுக்கான அகவிலைப்படி 46 சதவீதமாக உயர்ந்திருக்கிறது.
மத்திய அமைச்சரவையின் முடிவுகள் குறித்து செய்தியாளர்களிடம் பேசிய தகவல் மற்றும் ஒலிபரப்புத் துறை அமைச்சர் அனுராக் தாக்கூர், “மத்திய அரசு ஊழியர்களுக்கான அகவிலைப்படியும், ஓய்வூதியம் பெறுபவர்களுக்கான அகவிலைப்படியும் 4 சதவீதம் உயர்த்தப்பட்டிருக்கிறது. இந்த உயர்வு 2023 ஜூலை 1-ம் தேதி முதல் முன்தேதியிட்டு அமல்படுத்தப்படும்.
இந்த முடிவின் மூலம், 48.67 லட்சம் மத்திய அரசு ஊழியர்களும், 67.95 லட்சம் ஓய்வூதியதாரர்களும் பயனடைவார்கள். பண்டிகை காலத்தில் இந்த முடிவு எடுக்கப்பட்டிருப்பதால், மத்திய அரசு ஊழியர்கள் மற்றும் ஓய்வூதியதாரர்கள் பயனடைவார்கள்” என்றார்.
