இஸ்ரேல் மீது ஹமாஸ் தீவிரவாதிகள் தாக்குதல் நடத்தியதற்கு சவூதி அரேபியா அங்கீகரித்துவிடக் கூடாது என்பதுதான் காரணம் என்று அமெரிக்க அதிபர் ஜோ பைடன் ரகசியத்தை உடைத்திருக்கிறார்.
பிரிட்டிஷ் ஆட்சியாளர்கள் நாட்டை விட்டு வெளியேறியதைத் தொடர்ந்து, 1948-ம் ஆண்டு மே மாதம் 14-ம் தேதி, யூதத் தலைவர்கள் சேர்ந்து இஸ்ரேல் தனி நாடு அறிவிப்பை வெளியிட்டனர். அந்நாட்டை அன்றையதினமே தனி நாடாக அமெரிக்கா அங்கீகரித்தது. தொடர்ந்து, இந்தியா உள்ளிட்ட பல்வேறு நாடுகள், இஸ்ரேலை தனிநாடாக அங்கீகரித்தன.
ஆனால், அரபு நாடுகள் மட்டும் இஸ்ரேலை தனி நாடாக அங்கீகரிக்கவில்லை. குறிப்பாக, சவூதி அரேபியா தற்போதுவரை இஸ்ரேலை தனி நாடாக அங்கீகரிக்கவில்லை. இதன் காரணமாக, இஸ்ரேலுக்கும் சவூதி அரேபியாவுக்கும் இடையே சுமூகமான உறவு இல்லாமல் இருந்து வந்தது. ஆனால், சமீப காலங்களில் இரு நாடுகளும் ஒரு நல்ல உறவு அமைய அடித்தளம் அமைத்து வந்தன.
இரு நாடுகளும் ஒன்றையொன்று நெருங்கி வருவதற்கான முயற்சிகளில் அமெரிக்கா தீவிரமாக ஈடுபட்டு வந்தது. கடந்த செப்டம்பர் மாதம் அமெரிக்க அதிபர் ஜோ பைடனை சந்தித்த இஸ்ரேல் பிரதமர் பெஞ்சமின் நேதன்யாகு, அமெரிக்க அதிபரின் தலைமையில் சவூதி அரேபியாவுடன் அமைதியை நிலைநாட்ட முடியும் என்று நம்புவதாகத் தெரிவித்திருந்தார்.
இந்த நிலையில்தான், கடந்த 7-ம் தேதியன்று இஸ்ரேல் மீது பாலஸ்தீனத்தின் காஸா நகரைச் சேர்ந்த ஹமாஸ் தீவிரவாதிகள் தாக்குதல் நடத்தினர். இதற்கு இஸ்ரேலும் கடுமையான பதிலடித் தாக்குதல் நடத்தி வருகிறது. இச்சம்பவத்தில், அமெரிக்கா, இங்கிலாந்து, கனடா, பிரான்ஸ், ஜெர்மனி உள்ளிட்ட மேற்கத்திய நாடுகள் இஸ்ரேலை ஆதரிக்கின்றன.
அதேபோல, பாலஸ்தீனத்தை ஈரான், கத்தார், லெபனான் உள்ளிட்ட அரபு நாடுகள் ஆதரிக்கின்றன. அந்த வகையில், பாலஸ்தீன பொதுமக்களுக்கு ஆதரவான நிலைப்பாட்டையே சவூதி அரேபியாவும் எடுத்திருக்கிறது. இதன் காரணமாக, இஸ்ரேலுக்கும் சவூதி அரேபியாவிற்கும் இடையேயான உறவு மீண்டும் நலிவடையத் தொடங்கி இருக்கிறது.
இந்த நிலையில், இதுகுறித்து பேசிய அமெரிக்க அதிபர் ஜோ பைடன், “திடீரென இஸ்ரேல் மீது ஹமாஸ் தாக்குதல் நடத்தியதற்குக் காரணம், சவூதி அரேபியாவிற்கும் இஸ்ரேலுக்கும் இடையே நல்லுறவு ஏற்படக் கூடாது என்று ஹமாஸ் எண்ணியதுதான். இரு நாடுகளுக்கும் இடையே பேச்சுவார்த்தை நடக்க வழி செய்து, நல்லுறவை ஏற்படுத்த முயன்றேன். இஸ்ரேலை தனி நாடாக சவூதி அரேபியா அங்கீகரிக்கவும் முன்வந்தது. ஆனால், வரலாற்று சிறப்புமிக்க அத்தகைய நிகழ்வு நடந்து விடக் கூடாது என்று ஹமாஸ் விரும்புகிறது. இதனால்தான் திடீர் தாக்குதலை நடத்தியது” என்று கூறியிருக்கிறார்.
