வாணியம்பாடி அருகே அதிகாலையில் தனியார் ஆம்னி பேருந்து மீது அரசு சொகுசு பேருந்து மோதிக் கொண்ட விபத்தில், 5 பேர் பரிதாபமாக உயிரிழந்தனர். 40- க்கும் மேற்பட்டோர் படுகாயமடைந்தனர்.
பெங்களுருவில் இருந்து சென்னை நோக்கி அரசு சொகுசு பேருந்து ஒன்று சென்று கொண்டு இருந்தது. அந்த பேருந்து திடீரென ஓட்டுநரின் கட்டுப்பாட்டை இழந்து, சாலையின் தடுப்புச் சுவற்றை உடைத்துக் கொண்டு சென்றது.
அப்போது, சென்னையில் இருந்து பெங்களூருவை நோக்கி சென்று கொண்டு இருந்த தனியார் ஆம்னி பேருந்து மீது பயங்கரமாக மோதியது. இதில், ஒரு பெண் உட்பட 5 பேர் அதே இடத்தில் உயிரிழந்தனர். மேலும், இந்த விபத்தில் 40 -க்கும் மேற்பட்டோர் படுகாயம் அடைந்தனர்.
சாலையில் சென்றவர்கள் அவர்களை மீட்டு, வாணியம்பாடி அரசு மருத்துவமனைக்கு ஆம்புலன்ஸ் மூலம் அனுப்பிவைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது.
இந்த விபத்தில் சென்னையை சேர்ந்த கிருத்திகா (35), வாணியம்பாடிச் சேர்ந்த முகமது பைரோஸ் (45), சித்தூரைச் சேர்ந்த அஜீத் (25), மற்றும் அரசு விரைவு பேருந்து ஓட்டுநர் ஏழுமலை உள்ளிட்டோர் உயிரிழந்தனர்.
அதிகாலையில் நடந்த இந்த விபத்தால் சென்னை – பெங்களூரு தேசிய நெடுஞ்சாலையில் போக்குவரத்து பாதிக்கப்பட்டது.
தகவல் அறிந்து சம்பவ இடத்திற்கு சென்ற வாணியம்பாடி போலீசார் வழக்குப் பதிவு செய்து விசாரணை நடத்தி வருகின்றனர்.
