சபரிமலை ஐயப்பன் கோவிலில் இரண்டு மணி நேரம் கொட்டித் தீர்த்த கனமழையையும் பொருட்படுத்தாமல், இருமுடியோடு பக்தர்கள் நனைந்தவாறே பக்தி பரவசத்தில் சாமி தரிசனம் செய்தனர்.
உலகப் புகழ் பெற்ற சபரிமலை ஐயப்பன் திருக்கோவிலுக்கு, கேரளா மட்டுமல்லாது தமிழகம், கர்நாடகா, ஆந்திரா உள்ளிட்ட பல்வேறு மாநிலங்களிலிருந்தும் பக்தர்கள் மாலை அணிந்து, இருமுடி கட்டி சென்று சுவாமி தரிசனம் செய்து வருகின்றனர்.
சபரிமலை ஐயப்ப சுவாமி திருக்கோவிலில், மண்டல மற்றும் மகரவிளக்கு பூஜைக்காகக் கடந்த நவம்பர் மாதம் 16-ஆம் தேதி கோவில் நடை திறக்கப்பட்டது. இதனையொட்டி, ஏராளமான பக்தர்கள் இருமுடி கட்டி சுவாமி தரிசனம் செய்து வருகின்றனர்.
இந்த நிலையில், சபரிமலை மற்றும் சுற்றுவட்டாரப் பகுதிகளில் நேற்று மாலை கனமழை வெளுத்து வாங்கியது. தொடர்ந்து இரண்டு மணி நேரத்திற்கு கனமழை கொட்டித் தீர்த்தது.
கொட்டும் மழையையும் பொருட்படுத்தாமல், பல்லாயிரக்கணக்கான பக்தர்கள், பம்பையில் இருந்து சபரிமலைக்கு நடந்து வந்தனர். சபரிமலை சன்னிதானத்தின் நுழைவுவாயில் படிக்கட்டுகளில், மழைநீர் பெருக்கெடுத்து ஓடியதைப் பொருட்படுத்தாமல், ஐயப்ப பக்தர்கள் இருமுடி கட்டோடு சென்று 18 படிகளை ஏறி சென்று, சாமி தரிசனம் செய்தனர்.
