புதுச்சேரியில் சில மாதமாக கொரோனா தொற்று இல்லாமல் இருந்து வந்த நிலையில் தற்போது மீண்டும் கொரோனா தொற்று பரவி வருகிறது.
புதுச்சேரியில் சில மாதமாக கொரோனா தொற்று இல்லாமல் இருந்தது. கடந்த சில நாட்களாக பெய்த மழை காரணமாக மக்கள் சளி, காய்ச்சலால் அவதியடைந்து வருகின்றனர். டெங்கு, சிக்குன்குனியா, மலேரியா மற்றும் வைரஸ் காய்ச்சல் பரவி வருகிறது.
இதற்கு சிகிச்சை பெற அரசு மருத்துவமனைக்கு அதிக எண்ணிக்கையில் நோயாளிகள் வருகின்றனர். இதில் சிகிச்சைக்காக சென்ற 43 நோயாளிகளின் சளி மாதிரிகள் சேகரிக்கப்பட்டு பரிசோதனை செய்யப்பட்டது.
அதில் 9 பேருக்கு கொரோனா தொற்று இருப்பது ஆய்வில் தெரியவந்துள்ளது. இவர்களில் 3 பேர் அரசு மருத்துவமனைகளில் சிகிச்சை பெற்று வருகின்றனர். 6 பேர் வீட்டிலேயே தனிமைப்படுத்தப்பட்டு சிகிச்சை பெறுவதாகப் புதுவை சுகாதாரத்துறை தெரிவித்துள்ளது.
மேலும் கொரோனா தொற்றால் பாதிக்கப்பட்டவர்களோடு தொடர்பில் இருந்தவர்கள் விவரம் சேகரிக்கப்பட்டு, அனைவரும் கண்காணிக்கப்பட்டு வருவதாக அதிகாரிகள் தெரிவித்துள்ளனர்.
புதுச்சேரியில் கடந்த மே மாதத்திற்குப் பிறகு கொரோனா தொற்று கண்டறியப்படவில்லை. 7 மாதத்திற்குப் பிறகு மீண்டும் கொரோனா தொற்று உறுதி செய்யப்பட்டுள்ளது.
