உலகப் புகழ் பெற்ற அயோத்தி ஶ்ரீராமர் கோவில் கும்பாபிஷேக விழா, வரும் ஜனவரி 22 -ம் தேதி நடைபெற உள்ளது.
கடந்த 2020 -ம் ஆண்டு ஆகஸ்ட் மாதம், அயோத்தி ஶ்ரீராமர் கோவிலுக்கு பாரதப் பிரதமர் மோடி அடிக்கல் நாட்டி தொடங்கி வைத்தார். திருப்பணிகள் நிறைவடைந்து, வரும் 22 -ம் தேதி அன்று பிரதமர் மோடியின் திருக்கரங்களால் திறந்து வைக்கப்பட உள்ளது.
இந்த நிலையில், பகவான் ஶ்ரீராமர் கோவில் கும்பாபிஷேகம், பாரதத்தின் ஒட்டுமொத்த மக்களுக்கும் மற்றுமொரு தீபாவளிப் பண்டிகையாக இருக்கும் வகையில், அன்றைய தினம் நாட்டு மக்கள் அனைவர் இல்லங்களிலும் தீபங்கள் ஏற்றிக் கொண்டாட வேண்டும் என பிரதமர் மோடி வேண்டுகோள் விடுத்தார்.
இதனால், பிரதமர் மோடி அறிவுரையின்பேரில், மகா கும்பாபிஷேகப் பெருவிழாவில், நாடு முழுவதும் உள்ள பக்தர்கள் கலந்து கொள்ள அழைப்பிதழ் வழங்கும் பணி நாடு முழுவதும் முழுவீச்சில் நடைபெற்று வருகிறது.
இதனிடையே, சென்னை போயஸ் கார்டனில் சூப்பர் ஸ்டார் ரஜினிகாந்துக்கு, ஆர்.எஸ்.எஸ். நிர்வாகிகள் ஸ்ரீசெந்தில் ஜி, ராம்குமார், பிரகாஷ், ராமராஜ சேகர் மற்றும் பாஜக சமூக ஊடகப் பிரிவு மாநில பார்வையாளர் அர்ஜூன மூர்த்தி, ஆகியோர், புனித அயோத்தி ஸ்ரீராமர் கும்பாபிஷேக அழைப்பிதழ், ஸ்ரீராமர் படம், அட்சதையை வழங்கி அழைப்பு விடுத்தனர். இதனை ரஜினிகாந்த் பயபக்தியுடன் பெற்றுக் கொண்டார்.
