தமிழ்நாடு சமூக சேவை சங்கத்தின் எஃப்.சி.ஆர்.ஏ பதிவை, மத்திய உள்துறை அமைச்சகம் ரத்து செய்து உத்தரவிட்டுள்ளது. இதனால், கத்தோலிக்க கிறிஸ்துவர்கள் கடும் அதிர்ச்சி அடைந்துள்ளனர்.
கத்தோலிக்க கிறிஸ்தவ சமூக சேவை அமைப்பின் ஒரு அங்கமான தமிழ்நாடு சமுக சேவை சங்கம் செயல்பட்டு வருகிறது. இது ஒரு அரசு சாரா அமைப்பு தொண்டு நிறுவனம் ஆகும். தமிழ்நாடு கத்தோலிக்க ஆயர்கள் மாநாட்டின் அதிகாரப்பூர்வ அமைப்பாகும்.
இந்த தொண்டு நிறுவனம் ஒரு சமூக அமைப்பாகப் பதிவு செய்யப்பட்டுள்ளது. பதிவு செய்யப்பட்ட சங்கங்கள் சமூக, கல்வி, மதம், பொருளாதார மற்றும் கலாச்சார நிகழ்ச்சிகளுக்கு வெளிநாடுகளிலிருந்து நிதி பெற முடியும். இந்தியாவில் உள்ள எந்த ஒரு நிறுவனமும் வெளிநாட்டு நன்கொடை பெற எஃப்.சி.ஆர்.ஏ பதிவு கட்டாயமாகும்.
விதி மீறல் காரணமாக இதன் பதிவு ரத்து செய்யப்பட்டுள்ளது. இதன் காரணமாக, இந்த தொண்டு நிறுவனம் இனி வெளிநாட்டு நன்கொடைகளை பெறமுடியாது. இதற்கான உத்தரவை மத்திய உள்துறை அமைச்சகம் வெளியிட்டுள்ளது.
ஏற்கனவே, வேர்ல்ட் விஷன் இந்தியா என்ற அமைப்பின் எஃப்.சி.ஆர்.ஏ பதிவை மத்திய உள்துறை அமைச்சகம் ரத்து செய்துள்ளது. வேர்ல்ட் விஷன் இந்தியா அமைப்பு கடந்த 70 ஆண்டுகளாக இந்தியாவில் செயல்பட்டு வந்தது. இந்த நிலையில், தற்போது தமிழ்நாடு சமுக சேவை சங்கத்தின் எஃப்.சி.ஆர்.ஏ பதிவு ரத்து செய்யப்பட்டுள்ளது. இது தமிழ்நாட்டைச் சேர்ந்த இரண்டாவது கிறிஸ்தவ சங்கம் இதுவாகும்.
கடந்த 2015-ம் ஆண்டு முதல், விதிமீறலில் ஈடுபட்ட 16,000-க்கும் மேற்பட்ட தொண்டு நிறுவனங்களின் எஃப்.சி.ஆர்.ஏ பதிவு ரத்து செய்யப்பட்டுள்ளது குறிப்பிடத்தக்கது.
