கடலூர் மாவட்டம், வடலூரை அடுத்துள்ள பார்வதிபுரம் என்ற பகுதியில் கடந்த 1867 – ம் ஆண்டில் சத்திய ஞானச் சபையை இராமலிங்க அடிகளார் அமைத்தார்.
இதற்காகப் பார்வதிபுரத்தில் உள்ள பொது மக்களிடமிருந்து 106 ஏக்கர் நிலங்களை நன்கொடையாகப் பெற்றார். அப்படி பெறப்பட்ட நிலத்தில், சத்திய ஞானசபை, தருமசாலை, ஒளித்திருக்கோயில் ஆகியவற்றை அமைத்தார். மீதமுள்ள இடத்தில் பக்தர்கள் கூடுவதற்கான பெருவெளியாக பயன்படுத்தினார்.
கோவிலில் ஏற்றப்படும் தீபத்தின் ஒளி ஏழு திரைகளை விலக்கி காட்டப்படும் போது, அதைப் பக்தர்கள் எந்த தடையுமின்றிப் பார்க்க வேண்டும் என்பதற்காகவே 70 ஏக்கரில் பெருவெளி அமைக்கப்பட்டது.
ஆனால், அந்த பெருவெளியில் வள்ளலார் பன்னாட்டு மையத்தை அமைக்கத் தமிழக அரசு முடிவு செய்துள்ளது. மேலும், அதற்கான நடவடிக்கைகளில் ஈடுபட்டுள்ளது.
பக்தர்கள் வழிபடுவதற்காக உருவாக்கப்பட்ட பெருவெளியில், வள்ளலார் பன்னாட்டு மையத்தை அமைக்கத் தமிழக அரசு எடுத்துள்ள நடவடிக்கைக்கு பல்வேறு திசைகளில் இருந்தும் கடும் எதிர்ப்பு கிளம்பியுள்ளது.
குறிப்பாக, வள்ளலார் பக்தர்களும், சமரச சுத்த சன்மார்க்க சங்கத்தினரும் கடும் எதிர்ப்பு தெரிவித்து வருகின்றனர்.
மேலும், வள்ளலாரின் கொள்கைக்கும், பொது மக்களின் விருப்பத்திற்கும் எதிராகத் தி.மு.க. அரசு செயல்படுவதாகக் கண்டனம் தெரிவித்துள்ளனர்.
எனவே, தமிழக அரசின் இந்த முயற்சியைக் கைவிட வேண்டும், இல்லையெனில் பெரும் போராட்டம் வெடிக்கும் என பல்வேறு அரசியல் கட்சிகளும், சமூக அமைப்புகளும் தி.மு.க அரசுக்கு எச்சரிக்கை விடுத்துள்ளன. இந்த நிலையில், தமிழக அரசின் நடவடிக்கையை கண்டித்து பல்வேறு பகுதிகளில் போராட்ட அறிவிப்பு வெளியாகியுள்ளது.
