திமுகவும், அதிமுகவும் கள்ளக் கூட்டணி வைத்து இந்தத் தேர்தலை சந்திப்பதாக, அமமுக கட்சியின் பொதுச் செயலாளரும், தேனி பாராளுமன்ற தொகுதியின் வேட்பாளருமான டிடிவி தினகரன் குற்றம் சாட்டியுள்ளார்.
மதுரை மாவட்டம் அலங்காநல்லூரில் தேசிய ஜனநாயகக் கூட்டணியின் சார்பில், ஆலோசனைக் கூட்டம் நடைபெற்றது. இதில், அமமுக கட்சியின் பொதுச் செயலாளரும், தேனி பாராளுமன்ற தொகுதியின் வேட்பாளருமான டிடிவி தினகரன் கலந்து கொண்டு பேசியபோது:
கடந்த சட்டமன்றத் தேர்தலின்போது, மகளிர் அனைவருக்கும் 1000 ரூபாய் உரிமை தொகை வழங்கப்படும் என்று ஸ்டாலின் வாக்குறுதி அளித்தார். ஆனால், 50 சதவீத பெண்களுக்கு உரிமை தொகை வழங்கவில்லை. மேலும், சிலிண்டருக்கு 100 ரூபாய் குறைப்பேன் என்று கூறிய வாக்குறுதியையும் நிறைவேற்றவில்லை.
தற்போது மக்களவைத் தேர்தலின் போது, மறுபடியும் பொய்யான வாக்குறுதிகளை அளித்து நாட்டை ஏமாற்ற பார்க்கிறார். திமுகவினர் திருந்தவே மாட்டார்கள் என்பதை பறை சாற்றிக் கொள்கிறார்கள்.
40 தொகுதிகளிலும் அதிமுக வெற்றி பெறும் என்று எடப்பாடி பழனிச்சாமி கூறிவருவது இந்த ஆண்டின் மிகச்சிறந்த காமெடி எனறு விமர்சித்தார். மேலும், திமுகவும் – அதிமுகவும் கள்ளக்கூட்டணி வைத்து இருக்கிறார்கள் என்று சாடினார்.
தமிழ்நாட்டில் தீய சக்தி திமுகவை ஆட்சி அதிகாரத்தை விட்டு இறக்கவும், துரோக சக்தி எடப்பாடி பழனிச்சாமியை ஒழிப்பதற்காகவும், அமமுக கட்சி மக்கள் நலன் சார்ந்து தேசிய ஜனநாயகக் கூட்டணியில் அங்கம் வகிக்கிறது.
தேனி மக்களவைத் தொகுதியில் தேசிய ஜனநாயகக் கூட்டணி குக்கர் சின்னத்தில் அதிக வாக்குகள் பெற்று அமோக வெற்றி பெறும் என்று கூறினார்.
