15-ஆவது நிதி ஆணைய பரிந்துரையின்பேரில், சென்னை மழை வெள்ள தடுப்பு பணிக்கு மத்திய அரசு சார்பில் 500 கோடி ரூபாய் ஒதுக்கீடு செய்யப்படுவதாக உள்துறை இணையமைச்சர் நித்யானந்த் ராய் தெரிவித்துள்ளார்.
இதுதொடர்பாக மக்களவையில் அவர் எழுத்துபூர்வமாக அளித்த பதிலில்,
மும்பை, சென்னை, கொல்கத்தா ஆகிய பெருநகரங்களில் வெள்ள தடுப்பு பணிகளை மேற்கொள்ள தேசிய பேரிடர் நிவாரண நிதியிலிருந்து தலா 500 கோடி ரூபாயும், அகமதாபாத், பெங்களூரு, ஹைதராபாத், புனே ஆகிய நகரங்களுக்கு தலா 250 கோடி ரூபாயும் ஒதுக்கீடு செய்யுமாறு 15-ஆவது நிதி ஆணையம் பரிந்துரை செய்ததாக கூறியுள்ளார்.
தேசிய பேரிடர் நிவாரண நிதியிலிருந்து விடுவிக்கப்படும் நிதிக்கு மாநில அரசும் 10 சதவீதம் பங்களிப்பதாக கூறிய உள்துறை இணையமைச்சர் நித்யானந்த் ராய், சென்னை வெள்ள தடுப்பு பணிக்கு மத்திய அரசு 561 கோடியே 29 லட்ச ரூபாய் ஒதுக்கியதாகவும், இதில் மத்திய அரசு சார்பில் 500 கோடி ரூபாய் விடுவிக்கப்படும் என்றும் தெரிவித்துள்ளார்.
புதுச்சேரிக்கு மாநில அந்தஸ்து வழங்குவது தொடர்பான கோரிக்கைக்கு பதிலளித்த அமைச்சர் நித்யானந்த் ராய், அதன் நிலவியல், நிர்வாகம் மற்றும் நிதியமைப்பைக் கருத்தில் கொண்டு தற்போதைய யூனியன் பிரதேச அந்தஸ்தே நீடிக்க வேண்டுமென மத்திய அரசு முடிவு செய்ததாக கூறியுள்ளார்.
