போலந்திலிருந்து 10 மணிநேர ரயில் பயணத்துக்குப் பின் பிரதமர் மோடி உக்ரைன் சென்றடைந்தார்.
பிரதமர் மோடி அதிகாரபூர்வ பயணமாக போலந்து, உக்ரைன் நாடுகளுக்கு கடந்த 21-ஆம் தேதி புறப்பட்டு சென்றார். போலந்தில் அந்நாட்டு பிரதமர் மற்றும் அதிபரை சந்தித்த பிரதமர் மோடி, 2 நாள் சுற்றுப்பயணத்தை முடித்துக் கொண்டு உக்ரைன் புறப்பட்டார்.
அந்த வகையில், ஏறத்தாழ 10 மணிநேர ரயில் பயணத்துக்குப் பின்னர், உக்ரைன் தலைநகர் கீவ் நகரை பிரதமர் மோடி சென்றடைந்தார். அவருக்கு உக்ரைன் அரசு சார்பில் உற்சாகமாக வரவேற்பு அளிக்கப்பட்டது.
1991-இல் சோவியத் யூனியனிலிருந்து பிரிந்து உக்ரைன் இறையாண்மைமிக்க தனி நாடான பின், இந்திய பிரதமர் ஒருவர் அந்நாட்டுக்குச் செல்வது இதுவே முதல்முறை என்பது குறிப்பிடத்தக்கது.
பின்னர், இந்திய வம்சாவளியினர் பிரதமர் மோடிக்கு உற்சாக வரவேற்பு அளித்தனர். பிரதமருடன் செல்ஃபி எடுத்தும் இந்திய வம்சாவளியினர் மகிழ்ந்தனர்.
தொடர்ந்து, கீவ் நகரில் உள்ள காந்தி சிலைக்கு பிரதமர் மோடி மலர்தூவி மரியாதை செலுத்தினார்.
இதனைத்தொடர்ந்து பிரதமர் மோடிக்கு உக்ரைன் அதிபர் ஜெலென்ஸ்கி வரவேற்பு அளித்தார். அப்போது இரு தலைவர்களும் கட்டியணைத்து நட்பை பரிமாறிக் கொண்டனர். பின்னர், ரஷ்யா தாக்குதலில் உயிரிழந்த 5 மாத குழந்தையின் நினைவு சின்னத்தை அவர்கள் பார்வையிட்டனர்.
