புருனே மற்றும் சிங்கப்பூர் சுற்றுப்பயணத்தை நிறைவு செய்து பிரதமர் மோடி டெல்லி திரும்பினார்.
பிரதமர் நரேந்திர மோடி அரசு முறைப் பயணமாக புருனே மற்றும் சிங்கப்பூர் ஆகிய நாடுகளுக்குச் சென்றார். சிங்கப்பூர் நாடாளுமன்றத்தில் அந்நாட்டின் பிரதமர் லாரன்ஸ் வாங்கை பிரதமர் மோடி சந்தித்து பேசினார்.
இந்த சந்திப்பின்போது சிங்கப்பூர்-இந்தியா இடையே பல்வேறு புரிந்துணர்வு ஒப்பந்தங்கள் கையெழுத்தாகின. மேலும் சிங்கப்பூர் பிரதமரை இந்தியாவிற்கு வருகை தருமாறு பிரதமர் மோடி அழைப்பு விடுத்தார். இதனை தொடர்ந்து பிரதமர் மோடி தமது சிங்கப்பூர் சுற்றுப்பயணத்தை நிறைவு செய்து, சிறப்பு விமானம் மூலம் டெல்லி வந்தடைந்தார்.
சிங்கப்பூர் பயணம் குறித்து எக்ஸ் தளத்தில் பதிவிட்ட பிரதமர் மோடி, தமது சிங்கப்பூர் பயணம் மிகவும் பயனுள்ளதாக அமைந்தது என்றும், இந்த பயணமானது இருநாடுகளுக்கு இடையிலான இருதரப்பு உறவுகளை பலப்படுத்த உதவும் என்றும் தெரிவித்துள்ளார். மேலும், சிறப்பான வரவேற்பு அளித்த சிங்கப்பூர் அரசு மற்றும் மக்களுக்கு அவர் நன்றி தெரிவித்துக்கொண்டார்.
