ஆம்ஸ்ட்ராங்கை கொலை செய்ய திட்டமிட்டு நாட்டு வெடிகுண்டு வாங்கியது எனக்கு தெரியாது என புதூர் அப்பு வாக்குமூலம் அளித்துள்ளார்.
சென்னை பெரம்பூர் பகுதியில் கடந்த ஜூலை மாதம் 5-ம் தேதி பகுஜன் சமாஜ் கட்சி மாநில தலைவராக இருந்த ஆம்ஸ்ட்ராங் வெட்டி படுகொலை செய்யப்பட்டார். இந்த வழக்கில் அடுத்தடுத்து பல்வேறு நபர்கள், ரவுடிகளை கைது செய்யும் பணியில் போலீசார் ஈடுபட்டு வருகின்றனர். ஆம்ஸ்ட்ராங் கொலை வழக்கு தொடர்பாக இதுவரை 28 பேரை செம்பியம் தனிப்படை போலீசார் கைது செய்துள்ளனர்.
இரு தினங்களுக்கு முன்பு டெல்லியில் கைது செய்யப்பட்ட ரவுடி புதூர் அப்புவை போலீசார் சென்னை அழைத்து வந்து நடத்தப்பட்ட விசாரணையில் பல்வேறு தகவல்கள் வெளியாகி உள்ளன. அதில், ஆம்ஸ்ட்ராங்கை கொலை செய்ய திட்டமிட்டு நாட்டு வெடிகுண்டு வாங்கியது தமக்கு தெரியாது என வாக்குமூலம் அளித்துள்ளார்.
மேலும், தமக்கும் சம்போ செந்தில் ரவுடிக்கும் நேரடி தொடர்பு எதுவும் இல்லை எனவும், சிறையில் இருந்தபோது அவருடைய கூட்டாளிகளுடன் தொடர்பு ஏற்பட்டு, ஒரேமுறை சம்போ செந்திலிடம் செல்போனில் பேசியதாகவும் தெரிவித்துள்ளார்.
மேலும், கே.கே நகரில் உள்ள நண்பர் குடோனில் பதுக்கி வைத்திருந்த 6 நாட்டு வெடிகுண்டுகளை வழக்கறிஞர் மொட்டை கிருஷ்ணன் மற்றும் ஹரிகரன் ஆகியோர் மூலமாக வழக்கறிஞர் அருளுக்கு கொடுத்ததாகவும் அவர் கூறியுள்ளார். எனினும் ரவுடி அப்புவிடம் போலீசார் தொடர்ந்து விசாரணை நடத்தி வருகின்றனர்.
