ஈரோட்டில் பச்சிளம் குழந்தையை நாகர்கோவிலை சேர்ந்த தம்பதியினருக்கு விற்ற பெண் தரகர் உள்பட 5 பேரை போலீசார் கைது செய்தனர்.
கனி ராவுத்தர் குலம் பகுதியில் வசித்து வந்த நித்தியாவுக்கு ஏற்கனவே திருமணமாகி இரண்டு குழந்தைகள் உள்ளன. இந்த நிலையில், மாணிக்கம் பாளையம் பகுதியை சேர்ந்த சந்தோஷ்குமார் என்பவருடன் நித்தியாவுக்கு திருமணத்தை மீறிய உறவு இருந்து வந்துள்ளது.
இதனால் கருவுற்ற நித்தியாவுக்கு கடந்த 1 மாதத்திற்கு முன்பு அரசு மருத்துவமனையில் குழந்தை பிறந்துள்ளது. இதனையடுத்து குழந்தையை விற்க முடிவு செய்த சந்தோஷ்குமார், செல்வி என்ற தரகரை அணுகியுள்ளார்.
பின்னர் அவருடைய உதவியுடன் குழந்தையை நாகர்கோயில் பகுதியை சேர்ந்த தம்பதிக்கு நான்கரை லட்சம் ரூபாய்க்கு விற்றுள்ளார். இதனால் அதிர்ச்சியடைந்த நித்தியா இதுகுறித்து குழந்தை நலக்குழுவுக்கு புகாரளித்த நிலையில் சந்தோஷ்குமார், செல்வி உள்பட 5 பேரை போலீசார் கைது செய்து சிறையில் அடைத்தனர்.
