டெல்லியில் இரு போக்குவரத்துக் காவலர்கள் காரில் 20 மீட்டர் தூரத்துக்கு இழுத்துச் செல்லப்பட்ட வீடியோ இணையத்தில் வைரலாகி வருகிறது.
டெல்லி வேதாந்த் தேஷிகா மார்க் அருகே உள்ள பெர் சராய் சிக்னலில் சனிக்கிழமை இரவு கார் ஒன்று போக்குவரத்து விதிகளை மீறியது. அப்போது அங்கு பணியிலிருந்த போக்குவரத்துக் காவலர்களான பிரமோத் மற்றும் சைலேஷ் சவுகான் ஆகியோர், சம்பந்தப்பட்ட காரை தடுத்து நிறுத்த முயன்றனர்.
அப்போது அந்த கார் போக்குவரத்துக் காவலர்கள் இருவர் மீதும் மோதியதுடன், அவர்களை அங்கிருந்து 20 மீட்டர் தூரத்துக்கு வேகமாக இழுத்துச் சென்றது. இதில் காவலர்கள் இருவரும் காயமடைந்த நிலையில், சம்பந்தப்பட்ட கார் அங்கிருந்து தப்பிச் சென்றது.
இதனையடுத்து போக்குவரத்துக் காவலர்கள் இருவரும் மீட்கப்பட்டு மருத்துவமனையில் அனுமதிக்கப்பட்டனர். இதுதொடர்பாக கொலை முயற்சி உள்ளிட்ட 3 பிரிவுகளின் கீழ் வழக்குப்பதிவு செய்த போலீசார், சம்பந்தப்பட்ட நபர் விரைவில் அடையாளம் காணப்பட்டு கைது செய்யப்படுவார் என தெரிவித்துள்ளனர்.
