தமிழகத்தில் நடைபெற இருக்கும் ராஜ்யசபா தேர்தலில் போட்டியிடும் வேட்பாளர்களின் சொத்து விவரங்களை இந்த செய்தித் தொகுப்பில் சற்று விரிவாக பார்க்கலாம்.
திமுக சார்பில் போட்டியிடும் திருச்சி சிவா தாக்கல் செய்துள்ள பிரமாணப் பத்திரத்தில், வங்கி வைப்புத் தொகை, முதலீடுகள் வகையில் 2.18 கோடி ரூபாயும், குடும்பத்தினரின் பெயரில் 72.75 லட்சம் ரூபாயும் உள்ளதாக தெரிவிக்கப்பட்டுள்ளது.
திருச்சி சிவாவுக்கு 3.86 கோடி ரூபாய்க்கு நிலம், வீடு போன்ற அசையா சொத்துக்களும், மனைவி மற்றும் குடும்பத்தினரின் பெயரில் 97 லட்சம் ரூபாய்க்கு அசையா சொத்துக்களும் உள்ளன.
வங்கி மற்றும் தனி நபர்களுக்கு செலுத்த வேண்டிய கடன் 1.06 கோடி ரூபாய் உள்ளதாகவும், தன் மொத்த சொத்து மதிப்பு 7.75 கோடி ரூபாய் இருப்பதாகவும் திருச்சி சிவா தன் வேட்புமனுவில் குறிப்பிட்டுள்ளார்.
அதிமுக சார்பில் போட்டியிடும் தம்பிதுரை தாக்கல் செய்துள்ள பிரமாணப் பத்திரத்தில்,
மனைவி மற்றும் குடும்ப உறுப்பினர்களின் மூலம் ஆண்டுக்கு 1.02 கோடி ரூபாய் வருமானம் கிடைப்பதாக கூறியுள்ளார்.
தம்பிதுரை மனைவியிடம் 3.04 கிலோ தங்கம், 30.60 கிலோ வெள்ளி உள்ளதோடு, 59.88 கோடி ரூபாய்க்கு அசையா சொத்துக்களும் உள்ளன.
தம்பிதுரை மனைவி பெயரில் 15 கோடி ரூபாய் கடன் உள்ளதாகவும், அவரின் மொத்த சொத்து 70.69 கோடி ரூபாயாகவும் உள்ளது.
பாமக சார்பில் போட்டியிடும் அன்புமணி தாக்கல் செய்த பிரமாணப்பத்திரத்தில், மனைவி, மகள்கள் மற்றும் தமது பெயரில் 68.17 கோடி ரூபாய் அசையும் மற்றும் அசையா சொத்துக்கள் உள்ளதாக கூறப்பட்டுள்ளது.
அன்புமணியிடம் 960 கிராம் தங்கம், சவுமியாவிடம் 2,927 கிராம் தங்கம், மகளிடம் 551 கிராம் தங்கமும் உள்ளன.
அன்புமணி மனைவி சவுமியாவிடம் 1.64 கோடி ரூபாய் மதிப்புள்ள 151 காரட் வைரம், மகளிடம் 4.34 லட்சம் மதிப்புள்ள வைரமும் உள்ளது.
தேமுதிக வேட்பாளர் சுதீஷ் தாக்கல் செய்துள்ள பிரமாணப்பத்திரத்தில்,
தம்மிடம் 450 கிராம் தங்கம், 2 கிலோ வெள்ளி மற்றும் 4.83 லட்சம் ரூபாய் மதிப்பிலான வைரங்களும் உள்ளதாக குறிப்பிட்டுள்ளார்.
சுதீஷ் மனைவியிடம் ஒன்றரை கிலோ தங்கம், 2850 கிராம் வெள்ளி, அவரை சார்ந்து இருப்பவர்களிடம் 1450 கிராம் தங்கம் உள்ளன.
சுதீஷிடம் 28.16 கோடி ரூபாய் அளவிற்கும், மனைவியிடம் 19.69 கோடி ரூபாய்க்கும் அசையா சொத்துக்கள் உள்ளன.
சுதீஷ் பெயரில் 4.72 கோடி ரூபாயும், மனைவி பெயரில் 5.24 கோடி ரூபாயும் கடன் உள்ளதாகவும் அவரின் வேட்புமனுவில் தெரிவிக்கப்பட்டுள்ளது.
காங்கிரஸ் வேட்பாளர் கிறிஸ்டோர் திலக் தாக்கல் செய்துள்ள பிரமாணப்பத்திரத்தில்,
தமது பெயரில் 9.22 லட்சம் ரூபாய் மதிப்பில் அசையும் சொத்துக்களும், 1.07 கோடி ரூபாய் மதிப்பில் அசையா சொத்துக்களும் உள்ளதாக கூறியுள்ளார்.
திமுக வேட்பாளர் கான்ஸ்டன்டைன் ரவீந்திரனிடம் 90 ஆயிரம் ரூபாயும், மனைவி சரோஜினியிடம் 50 ஆயிரம் ரூபாயும், அவரை சார்ந்து இருப்போரிடம் 1.25 லட்சம் ரூபாயும் உள்ளதாக பிரமாணப்பத்திரத்தில் தெரிவிக்கப்பட்டுள்ளது.
கான்ஸ்டன்டைன் ரவீந்திரனிடம் 15 சவரனும், மனைவியிடம் 75 சவரனும் அவரை சார்ந்து இருப்போரிடம் 105 சவரன் தங்க நகைகளும் உள்ளன.
அதோடு, தனது பெயரில் 3.80 கோடி ரூபாய் அளவிற்கும், மனைவி பெயரில் 1.43 கோடி ரூபாய் அளவிற்கும் அசையா சொத்து இருப்பதாகவும் வேட்புமனுவில் குறிப்பிட்டுள்ளார்.
