ஊழல் வழக்கில் தண்டனை விதிக்கப்பட்டு சிறையில் அடைக்கப்பட்டிருக்கும், பாகிஸ்தான் முன்னாள் பிரதமரும், தெஹ்ரீக் இ இன்சாப் கட்சியின் தலைவருமான இம்ரான் கானின் 9 ஜாமீன் மனுக்களை இஸ்லாமாபாத் நீதிமன்றங்கள் நிராகரித்து விட்ட சம்பவம் பரபரப்பை ஏற்படுத்தி இருக்கிறது.
2018 முதல் 2022-ம் ஆண்டுவரை பாகிஸ்தான் நாட்டின் பிரதமராக இருந்தவர் பிரபல கிரிக்கெட் வீரர் இம்ரான் கான். இவரது கூட்டணி அரசியல் அங்கம் வகித்த முக்கியக் கட்சி ஒன்று விலகி, எதிர்கட்சிக் கூட்டணியில் இணைந்ததால், இம்ரானின் ஆட்சி கவிழ்ந்தது. இதன் பிறகு, இம்ரான் கான் மீது ஊழல், முறைகேடு, கொலை மிரட்டல், பயங்கரவாதம், தேச துரோகம் உள்ளிட்ட பல்வேறு வழக்குகள் பதிவு செய்யப்பட்டன. இதில், ஊழல் வழக்கில் இம்ரான் கான் கடந்த மே மாதம் கைது செய்யப்பட்டார்.
இதையடுத்து, இம்ரானின் ஆதரவாளர்கள் வன்முறை வெறியாட்டங்களில் ஈடுபட்டனர். இதில், பொதுச் சொத்துக்களுக்கு சேதம் விளைவிக்கப்பட்டதோடு, பல்வேறு பகுதிகளில் இராணுவ அலுவலகங்கள் மீதும் தாக்குதல் நடத்தப்பட்டன. இதைத் தொடர்ந்து, வன்முறையில் ஈடுபட்டவர்கள் கைது செய்யப்பட்டனர். இது தொடர்பாக, இம்ரான் கான் மற்றும் அவரது ஆதரவாளர்கள் மீது பல்வேறு காவல் நிலையங்களில் வழக்குப் பதிவு செய்யப்பட்டது.
இதனிடையே, இம்ரான் கான் பிரதமராக இருந்த காலகட்டத்தில், அவருக்குக் கிடைத்த விலை உயர்ந்த பரிசுப் பொருட்களை அரசு கஜானாவில் ஒப்படைக்காமல், விற்று பணத்தை மோசடி செய்ததாக தோஷகானா ஊழல் வழக்குத் தொடரப்பட்டது. இவ்வழக்கில், இம்ரான் கானுக்கு இஸ்லாமாபாத் நீதிமன்றம் 5 ஆண்டுகள் சிறைத்தண்டனை விதித்தது. இதன் தொடர்ச்சியாக, இம்ரான் கான் தற்போது சிறையில் அடைக்கப்பட்டிருக்கிறார்.
இந்த நிலையில், வன்முறை தொடர்பாக பதிவு செய்யப்பட்ட வழக்குகளில் ஜாமீன் கோரி, இம்ரான் கான் தரப்பில் இஸ்லாமாபாத்திலுள்ள பல்வேறு நீதிமன்றங்களில் 9 மனுக்கள் தாக்கல் செய்யப்பட்டன. இவற்றில் 3 ஜாமீன் மனுக்களை இஸ்லாமாபாத் பயங்கரவாத தடுப்பு நீதிமன்றமும், 6 மனுக்களை கூடுதல் மாவட்ட மற்றும் அமர்வு நீதிமன்றமும் தள்ளுபடி செய்து உத்தரவிட்டிருக்கின்றன. இதனால், இம்ரான் கானுக்கு மேலும் சிக்கல் ஏற்பட்டிருக்கிறது.
