கடந்த சில மாதங்களாக வரத்து குறைவு காரணமாக உச்சத்தை எட்டும் அளவுக்கு உயர்ந்த தக்காளி விலை தற்போது குறையத் தொடங்கியுள்ள நிலையில், தற்போது பருப்பு விலை அதிகரிக்கலாம் என்று நிபுணர்கள் கூறுகின்றனர்.
கடந்த ஆண்டை ஒப்பிடுகையில் பருப்பு பயிரிடுதல் நடப்பாண்டில் பாதியளவாகக் குறைந்துள்ளது. ஆகஸ்ட் மாதத்தில் பெய்ய வேண்டிய பருவமழை வழக்கத்தை விட குறைவாகப் பெய்ததே இதற்குக் காரணமாகக் கூறப்படுகிறது. தக்காளி உள்ளிட்ட காய்கறிகளின் விலை 37 சதவீதம் அதிகரித்ததால் சில்லறைப் பணவீக்கம் 15 மாதங்கள் இல்லாத அளவில் ஜூலையில் 7.5 சதவீதமாக அதிகரித்தது.
கடந்த ஜூலையில் 34.1 சதவீதம் விலையுயர்ந்த துவரம் பருப்பும், 9.1 சதவீதம் விலை உயர்ந்த பாசிப்பருப்பும் இனி மேலும் விலை உயரும் என்று பொருளாதார நிபுணர்கள் கணித்துள்ளனர். நடப்பு காரிஃப் பருவத்தில் 114.9 லட்சம் ஹெக்டேர் பரப்பளவில் பருப்பு வகைகள் பயிரிடப்பட்டாலும், போதிய மழை இல்லாததால் விளைச்சல் எதிர்பார்த்தபடி இருக்காது எனக் கூறுகின்றனர்.
இந்த மாதம் வழக்கத்தை விட மழை குறைவாக பெய்துவந்ததே இதற்குக் காரணம் என கூறுகின்றனர். உத்தரப் பிரதேசம், பிஹார், ஜார்க்கண்ட், கேரளா உள்ளிட்ட மாநிலங்களில் மழை வழக்கத்தைவிட மிக மிகக் குறைவாகப் பெய்துள்ளது. அதேபோல் நாட்டின் நீர்த்தேக்கங்களில் உள்ள நீரின் அளவும் ஆகஸ்ட் 17 நிலவரப்படி 62 சதவீதமாக உள்ளது.
கடந்த ஆண்டு இதே காலத்தில் நீர்த்தேக்கங்களில் இருந்த நீரின் அளவு 76 சதவீதமாக இருந்துள்ளது. போதிய பருவமழை பெய்யாததால், பருப்பு விதைக்கப்பட்ட பரப்பளவு கணிசமாகக் குறைந்துள்ளதும் துவரம் பருப்பு, பாசிப்பருப்பு உள்ளிட்ட பருப்பு விலையை அதிகரிக்கச்கூடும் என தெரிவந்துள்ளது.
