நான் மீண்டும் ஆட்சிக்கு வந்தால் இந்தியப் பொருட்களுக்கு அமெரிக்காவில் கூடுதல் வரி விதிக்கப்படும் என அமெரிக்க முன்னாள் அதிபர் டொனால்டு டிரம்ப் எச்சரிக்கை விடுவித்துள்ளார்.
இந்தியாவில் இருந்து பல்வேறு வகையான பொருட்கள், பல்வேறு நாடுகளுக்கு ஏற்றுமதியாகி வருகிறது.
தோல் தயாரிப்புகள், மின்னணு பொருட்கள் உள்ளிட்ட இந்தியப் பொருட்களை அமெரிக்கா அதிக அளவில் இறக்குமதி செய்கிறது. ‘சிறப்பு வர்த்தக நாடு’ என அங்கீகாரம் இருப்பதால், இந்தியப் பொருட்களுக்கு அமெரிக்கா குறைவான வரிகளையே விதிக்கிறது.
வழக்கமாக அமெரிக்கா உள்ளிட்ட வெளிநாடுகளில் இருந்து இறக்குமதி செய்யப்படும் பொருட்களுக்கு இந்திய அரசு கூடுதல் வரி விதிக்கும்நடைமுறைக்கு ஏற்கனவே அமெரிக்க அதிபராக இருந்தபோது டிரம்ப் கடும் எதிர்ப்பு தெரிவித்தார்.
அமெரிக்க பொருட்களுக்கு இந்தியா 100 முதல் 200 சதவீதம் வரை அதிகம் வரி வசூலிப்பதாக கூறி இந்திய வரி விதிப்பு முறையை கடுமையாக அவர் சாடினார். இருநாடுகளுக்கு இடையே ஏற்றுமதி, இறக்குமதி வரி வேறுபாடு உள்ளதாகவும் இதன் மூலம் அமெரிக்கா பாதிப்படைவதாகவும் கூறி சிறப்பு வர்த்தக சலுகைகளை நிறுத்தப்போவதாக அவர் அச்சுறுத்தினார் . இந்த அறிவிப்பால் அப்போது அமெரிக்காவில் பெரும் பரபரப்பு ஏற்பட்டது.
இந்திய நாட்டை ‘வரிவசூல் ராஜா’ என சாடிய அவர் அமெரிக்கா நாட்டின் மதுபானங்கள், இருசக்கரம் மற்றும் நான்கு சக்கர வாகனங்கள், செல்போன்கள் உள்ளிட்ட இறக்குமதி பொருட்களுக்கான வரிவிதிப்பு குறித்து பேசினார்.
“பலமுறை பேச்சுவார்த்தை நடத்தியும் அமெரிக்க பொருட்களுக்கு நியாயமான வரி விதிக்கப்படுவது இல்லை” எனக்கூறும் அவர் “தான் மீண்டும் ஆட்சிக்கு வந்தால் இந்திய பொருட்களுக்கு அமெரிக்காவில் கூடுதல் வரிவிதிக்கப்படும்” எனப் பகிரங்கமாக எச்சரிக்கை விடுத்துள்ளார். மேலும் “அமெரிக்க பொருட்களுக்கு அதிக வரிவிதிப்பு செய்யப்பட்டால் நாமும் அதற்கு ஈடுகொடுக்கும் வகையில் வரிவிதிக்க வேண்டும். அது பழிவாங்கல் என சொல்லப்பட்டாலும் சரி” என்றார்.
