ஈரோடு மாவட்ட டாஸ்மாக் தலைமை அலுவலகத்தில் லஞ்ச ஒழிப்புத்துறையினர் சோதனையில் ஈடுபட்டனர்.
திமுக ஆட்சிக் காலத்தில் நடைபெற்றதாக கூறப்படும் டாஸ்மாக் முறைகேடு தொடர்பான விசாரணையின் ஒரு பகுதியாக, ஈரோடு மாவட்ட சூரியம்பாளையத்தில் உள்ள டாஸ்மாக் மாவட்ட தலைமை அலுவலகத்தில் லஞ்ச ஒழிப்புத்துறையினர் திடீர் சோதனை நடத்தினர்.
துணை காவல் கண்காணிப்பாளர் சாந்தி தலைமையிலான குழுவினர், மாவட்டம் முழுவதும் விநியோகிக்கப்படும் மதுபானங்களின் வரவு, கையிருப்பு மற்றும் விநியோகம் தொடர்பான ஆவணங்களை ஆய்வு செய்தனர்.
மேலும், டாஸ்மாக் குடோனில் உள்ள பதிவுகள் மற்றும் அலுவலக ஊழியர்களிடமும் விசாரணை மேற்கொண்டு முக்கிய ஆவணங்களை பரிசோதித்து வருகின்றனர்.
கோவை மாவட்டம் பீளமேடு பகுதியில் செயல்பட்டு வரும் டாஸ்மாக் மண்டல அலுவலகத்தில் லஞ்ச ஒழிப்புத்துறை போலீசார் சோதனையில் ஈடுபட்டனர்.
குறிப்பாக, மதுபானங்கள் கொள்முதல், விற்பனை, தனியார் மதுக்கூடங்களுக்கு மதுபான விநியோகம், காலி மதுபான பாட்டில்களை திரும்பப் பெறுதல், அட்டை பெட்டிகள், பாட்டில் மூடிகள், ஸ்டிக்கர்கள் உள்ளிட்ட பணிகளுக்கான ஒப்பந்தப் புள்ளிகள் மற்றும் அதனுடன் தொடர்புடைய ஆவணங்கள் குறித்தும் ஆய்வு செய்துள்ளனர்.
கோவை மாவட்டம் ஆச்சிப்பட்டியில் உள்ள டாஸ்மாக் குடோன் மற்றும் மேளாளர் அலுவலகத்தில் 5 பேர் கொண்ட லஞ்ச ஒழிப்பு துறையினர் சோதனையில் ஈடுபட்டனர். ஆச்சிப்பட்டி குடோனுக்கு பல்வேறு மாநிலங்களில் தயாரிக்கப்படும் மதுபானங்கள் லாரிகள் மூலம் கொண்டுவரப்பட்டு பொள்ளாச்சி, வால்பாறை, கிணத்துக்கடவு, சூலூர் ஆகிய பகுதிகளில் செயல்படும் டாஸ்மாக் கடைகளுக்கு விற்பனைக்காக எடுத்துச் செல்லப்படுவது குறிப்பிடத்தக்கது.
புதுக்கோட்டை மாவட்டம் கந்தர்வக்கோட்டை அருகே தனியார் மதுபான ஆலைகளில் லஞ்ச ஒழிப்புத்துறை போலீசார் சோதனையில் ஈடுபட்டனர்.
கல்லாக்கோட்டை, விராலிமலை, குன்னத்தூரில் தனியார் மதுபான ஆலைகள் செயல்பட்டு வருகின்றன. இந்த நிலையில், கடந்த ஆட்சி காலத்தில் டாஸ்மாக்கிற்கு மதுபானங்கள் கொள்முதல் செய்யப்பட்டதில் முறைகேடுகள் நடந்ததாக எழுந்த குற்றச்சாட்டின் அடிப்படையில், லஞ்ச ஒழிப்புத்துறை போலீசார் ரெய்டில் ஈடுபட்டுள்ளனர். ஆவணங்கள், கொள்முதல் பதிவுகள் மற்றும் தொடர்புடைய விவரங்களை அதிகாரிகள் ஆய்வு செய்து வருகின்றனர்.
சோதனை நிறைவடைந்த பிறகே முறைகேடு நடந்ததா, அதன் அளவு என்ன என்பது குறித்து முழுமையான தகவல் வெளியாகும் என அதிகாரிகள் தெரிவித்துள்ளனர்.
