பாரதப் பிரதமர் மோடி பிறந்த நாளையொட்டி, 73 ஜோடிகளுக்கு, தமிழ்முறைப்படி, தமிழக பாஜக தலைவர் அண்ணாமலை தலைமையில், சிவனடியார்கள் முன்னிலையில் திருமணம் நடைபெற உள்ளது.
வரும், 17 -ம் தேதி, பாரதப் பிரதமர் மோடியின், 73 -வது பிறந்த நாள் விழா நாடு முழுவதும், பாஜகவினர் கோலாகலமாக கொண்டாட உள்ளனர்.
அன்றைய தினம், தமிழகம் முழுவதும், ஏழை, எளியோருக்கு பாஜக சார்பில் பல்வேறு நலத்திட்ட உதவிகள் வழங்கப்பட உள்ளன.
இதில், கோவை தெற்கு மாவட்ட பாஜக சார்பில், 73 ஜோடிகளுக்கு இலவச திருமண விழா மிக பிரமாண்டமாக நடைபெற உள்ளது.
தமிழ் முறைப்படி, சிவனடியார்கள் முன்னிலையில், தமழக பாஜக தலைவர் அண்ணாமலை தலைமையில் திருமணம் நடைபெற உள்ளது.
இந்த திருமண விழாவில், மணமகளுக்குத் தாலி, கட்டில், பீரோ உள்ளிட்ட ஒரு லட்சம் ரூபாய் மதிப்புள்ள சீர்வரிசை பொருட்களும், கூடவே, நாட்டு பசுவும் வழங்கப்பட உள்ளது.
புதுமணத் தம்பதிகளுக்கு வழங்குவதற்காக, ஈரோடு மாவட்டம், காங்கேயத்தில், 72 நாட்டு பசுக்களை வாங்கி, கிணத்துக்கடவில் உள்ள கோசாலையில் தயார் நிலையில் வைக்கப்பட்டுள்ளது. இதில், ஒரு ஜோடி தம்பதிக்கு, தலைவர் அண்ணாமலை தனது வீட்டில் ஆசையாக வளர்த்து வந்த நாட்டு பசுவை, திருமணப் பரிசாக வழங்க உள்ளார்.
இந்த விழாவில், கல்யாண விருந்து தயார் செய்தல், சீர்வரிசைப் பொருட்கள் வாங்குதல், தாலி செய்வது, பசுக்களை வாங்குவது, சுற்றுச்சூழலை பாதுகாப்பது என மொத்தம் 100 பேர் கொண்ட, 17 குழுக்கள் அமைக்கப்பட்டுள்ளது.
விழா ஏற்பாடுகளை, தமிழக பாஜக பொதுச் செயலாளர் ஏ.பி.முருகானந்தம் மற்றும் மாவட்டத் தலைவர் வசந்தராஜன் உள்ளிட்டோர் செய்து வருகின்றனர்.
