ஜாமீன் கிடைக்க வேண்டும் என்பதற்காக அமைச்சர் பதவியை செந்தில் பாலாஜி ராஜினாமா செய்துள்ளதாக தமிழக பாஜக மாநில தலைவர் அண்ணாமலை தெரிவித்துள்ளார்.
கரூர் மாவட்டம் அரவக்குறிச்சி தொகுதியில் நடைபெற்ற என் மண் என் மக்கள் பயணத்தில் பங்கேற்று அவர் உரையாற்றினார்.
அப்போது இந்தியாவிலேயே ஒரு மாநிலத்தின் அனைத்துத் தொகுதிகளுக்கும் சென்ற முதல் யாத்திரை நமது என் மண் என் மக்கள் யாத்திரைதான். தமிழகத்தின் அனைத்துத் தொகுதிகளுக்கும் சென்றதில் அறிந்து கொண்ட உண்மை, தமிழக மக்கள் அரசியலில் நேர்மையான மாற்றத்தை எதிர்பார்த்துக் கொண்டிருக்கிறார்கள். தமிழக பாஜகவின் யாத்திரையாக ஆரம்பித்த இந்தப் பயணம் இன்று மாபெரும் மக்கள் இயக்கமாக மாறி இருக்கிறது.
திமுக அரசின் 33 மாத கால ஊழல் ஆட்சியைத் தோலுரித்துக் காட்டிக் கொண்டிருக்கிறோம். பாரதப் பிரதமர் மோடியின், பத்தாண்டு கால நல்லாட்சியின் சாதனைகளை தமிழகத்தின் ஒவ்வொரு பகுதிக்கும் கொண்டு செல்கிறோம். நமது என் மண் என் மக்கள் பயணத்தின் 234 ஆவது தொகுதி நிறைவு விழா, வரும் பிப்ரவரி 27 அன்று, திருப்பூர் மாவட்டம் பல்லடம் தொகுதியில் நடைபெறவிருக்கிறது. நமது பிரதமர் மோடி அந்த மாபெரும் வெற்றி விழாவில் கலந்து கொண்டு சிறப்பிக்கவிருக்கிறார். பிற மாநிலங்களை விட தமிழகத்துக்கு நமது பிரதமர் அதிக முக்கியத்துவம் கொடுக்கிறார்.
தமிழக அரசியல் நேர்மையாக இருந்த காலத்தில் மக்கள் பிரதிநிதிகளாக இருந்த, அரசியல் அனுபவம் வாய்ந்த, தலைவர்கள் அனைவரும் இன்று பாஜகவில் இருக்கிறார்கள். ஊழலற்ற ஆட்சி பாஜகவால் மட்டும்தான் தர முடியும் என்பதை அனைவரும் உணர்ந்திருக்கிறார்கள். அடுத்த பத்து ஆண்டுகளில், நமது நாடு எப்படி இருக்க வேண்டும், அடுத்த 25 ஆண்டுகளில் எப்படி இருக்க வேண்டும் என்ற தொலை நோக்குச் சிந்தனையோடு செயல்பட்டு வருவதால், கடந்த 1984 ஆம் ஆண்டு இரண்டு பாராளுமன்ற உறுப்பினர்களை கொண்டிருந்த பாஜக, இன்று 303 பாராளுமன்ற உறுப்பினர்களோடு, தனிப் பெரும்பான்மை பெற்று இரண்டாவது முறையாகத் தொடர்ந்து ஆட்சி பொறுப்பில் இருக்கிறது.
அரவக்குறிச்சி இளைஞர்களுக்கு உள்ளூரில் வேலைவாய்ப்பு இல்லை. வேலை தேடி வெளியூர் செல்ல வேண்டிய நிலை இருக்கிறது. தொகுதியில் வாக்காளர்கள் எண்ணிக்கை குறைந்து கொண்டே வருகிறது. மூன்று நதிகள் அருகில் ஓடியும் விவசாயத்திற்கு தண்ணீர் இல்லை. இவை அனைத்தும் மாற வேண்டும். கரூரில், விவசாயம், நீர் மேலாண்மை, தொலை நோக்குப் பார்வையோடு திட்டங்கள், தொழில் நிறுவனங்கள் என அனைத்தும் வர வேண்டும். இத்தனை ஆண்டுகளாக ஆட்சி செய்தவர்கள், தொகுதியை முன்னேற்றுவதை விட, தங்களை முன்னேற்றிக் கொண்டார்கள்.
தொகுதி அமைச்சராக இருந்த செந்தில் பாலாஜி, தற்போது பண மோசடி வழக்கில் 280 நாட்களாக சிறையில் இருக்கிறார். இத்தனை நாட்களாக, துறை இல்லாத அமைச்சராக மக்கள் வரிப்பணத்தில் ஊதியம் பெற்ற அவர், இப்போதுதான் ஜாமீன் கிடைப்பதற்காக பதவியை ராஜினாமா செய்துள்ளார். அவரது தம்பி 280 நாட்களாகத் தலைமறைவாக இருக்கிறார். திமுகவில் 16 அமைச்சர்கள் மீது ஊழல் குற்றச்சாட்டு உள்ளதாகவும் அண்ணாமலை தெரிவித்தார்.
