செல்போன் எண்ணிற்கு ஆபாச குறுஞ்செய்தி அனுப்பி மசாஜ் செய்ய அழைப்பு விடுத்த நபரரை மடக்கிப் பிடித்த பாஜக பெண் நிர்வாகி காவல் நிலையத்தில் ஒப்படைத்தார்.
பாரதிய ஜனதா கட்சியின் திறன் மற்றும் விளையாட்டுப் பிரிவு செயலாளராக அலிஷா அப்துல்லா இருந்து வருகிறார். அவரது செல்போன் எண்ணுக்கு இளைஞர் ஒருவர், தொடர்ந்து பலமுறை ஆபாச குறுஞ்செய்தி அனுப்பி, மசாஜ் செய்ய வருமாறு அழைப்பு விடுத்துள்ளார்.
இதில் ஆத்திரமடைந்த அலிஷா அப்துல்லா இதுகுறித்து கேளம்பாக்கம் காவல் நிலையத்திற்கு தகவல் தெரிவித்துள்ளார். ஆனால் போலீசார் எந்த ஒரு நடவடிக்கையும் எடுக்காததால், தனி ஆளாக ஆபாச குறுஞ்செய்தி அனுப்பிய இளைஞர் தங்கியிருந்த நட்சத்திர விடுதிக்கே சென்று அவரைக் மடக்கிப் பிடித்துள்ளார்.
தொடர்ந்து தனது காரில் இளைஞரை ஏற்றி வந்து, நீலாங்கரை காவல் நிலையத்தில் ஒப்படைத்து புகார் அளித்தார். பின்னர் செய்தியாளர்களை சந்தித்த அலிஷா, புகாரளித்தும் காவல்துறை எந்த நடவடிக்கையும் எடுக்கவில்லை என குற்றம்சாட்டினார்.
மேலும் அதிகரித்து வரும் போதைப் பழக்கத்தாலேயே இதுபோன்ற செயல்கள் அரங்கேறுவதாகக் கூறிய அலிஷா, சாதாரண பெண்களுக்கு பாதுகாப்பான நிலையை உருவாக்க வேண்டுமென வலியுறுத்தினார்.
