அவதூறு வழக்கில் டி.ஆர்.பாலுவிடம் நேரடியாக குறுக்கு விசாரணை நடத்திய பாஜக தேசிய பொதுக்குழு உறுப்பினர் அண்ணாமலை, கப்பல் வாங்கியது தொடர்பாக கிடுக்கிப்பிடி கேள்விகளை எழுப்பினார்.
கடந்த 2023 ஏப்ரல் 14ம் தேதி செய்தியாளர்களை சந்தித்த அண்ணாமலை, DMK FILES என்ற பெயரில் பலரின் சொத்து விவரங்களை வெளியிட்டார்.
அதில், திமுக பொருளாளரும், எம்பியுமான டி.ஆர்.பாலுவுக்கு 21 நிறுவனங்கள் இருப்பதாகவும், அவருக்கும், அவரது குடும்ப உறுப்பினர்களுக்கும் பத்தாயிரம் கோடி ரூபாய் அளவுக்கு சொத்துகள் இருப்பதாகவும் குறிப்பிட்டிருந்தார்.
இதனையடுத்து, சென்னை சைதாப்பேட்டை நீதிமன்றத்தில் அண்ணாமலைக்கு எதிராக டி.ஆர்.பாலு அவதூறு வழக்கு தொடர்ந்தார்.
இந்த வழக்கு இன்று விசாரணைக்கு வந்த போது, நீதிமன்றத்தின் அனுமதியுடன் டி.ஆர்.பாலுவை அண்ணாமலை நேரடியாக குறுக்கு விசாரணை செய்தார்.
அப்போது, கப்பல் போக்குவரத்துத்துறை அமைச்சராக இருந்த போது டி.ஆர்.பாலு 10 கப்பல்கள் வாங்கியதாக அழகிரி கூறியது குறித்து அண்ணாமலை கேள்வி எழுப்பிய நிலையில்,
பத்து கப்பல்கள் வாங்கியதாக அழகிரி கூறியது தவறான தகவல் என்றும், தான் இரண்டு கப்பல்கள் மட்டுமே வாங்கியதாகவும் டி.ஆர்.பாலு பதிலளித்தார்.
தொடர்ந்து, டி.ஆர்.பாலு வைத்திருக்கும் 18 கார்கள், அவரது மகன் ராஜ்குமார் நடத்தும் கோல்டன் வாட்ஸ் மதுபான ஆலை உள்ளிட்டவை தொடர்பாக அண்ணாமலை சரமாரியாக கேள்வி எழுப்பினர்.
ஆனால், அந்த கேள்விகளுக்கு பதிலளிக்க முடியாமல் திணறிய டி.ஆர்.பாலு, தெரியாது, சரியல்ல என்று தனது பதில்களை சுருக்கமாக முடித்தார்.
தொடர்ந்து, டி.ஆர்.பாலுவின் குடும்பத்தினர் நடத்தும் சாராய ஆலை குறித்து அண்ணாமலை எழுப்பிய கேள்விக்கு, அது சாராய ஆலை அல்ல; ரசாயன ஆலை என்று பதிலளித்த டி.ஆர்.பாலு,
அந்த ஆலையில் தான் சிறிய பங்குதாரர் மட்டுமே; அந்த நிறுவனம் தனக்கு மட்டுமே சொந்தமானதல்ல என்றும் கூறினார்.
பதிலுக்கு, அண்ணாமலை அவரது மனைவி பெயரில் சொத்துக்களை வாங்கி இருப்பதாக குற்றம்சாட்டிய டி.ஆர்.பாலு,
ஊழல் முறைகேடு குற்றச்சாட்டால் தான் அண்ணாமலையின் மாநில தலைவர் பறிக்கப்பட்டதா? என கேள்வி எழுப்பினார்.
அப்போது குறுக்கிட்ட அண்ணாமலை, தவறான தகவல்களை வைத்து உள்நோக்கத்துடன் கேள்வி எழுப்பிய டி.ஆர்.பாலு மீது விரைவில் அவதூறு வழக்கு தொடரப்படும் என நீதிமன்றத்தில் தெரிவித்தார்.
தொடர்ந்து குறுக்கு விசாரணை நிறைவடையாததால், வழக்கு விசாரணை ஏப்ரல் 7-ம் தேதிக்கு தள்ளி வைக்கப்பட்டது.
