டெல்லியை சேர்ந்த ஊபர் ஓட்டுநர் ஒருவர் மாதம் அதிகபட்சமாக 1 லட்சம் ரூபாய் வரை வருமானம் ஈட்டுவதாக பேசிய வீடியோ இணையத்தில் வைரலாகி வருகிறது.
டெல்லி, மும்பை, பெங்களூரு, சென்னை உள்ளிட்ட பெரு நகரங்களில், ஆட்டோ மற்றும் கால் டாக்ஸிகளில் பயணிப்போர் எண்ணிக்கை அதிகரித்தபடி உள்ளது. இதனால் பலரும் ஓலா, ஊபர் போன்ற செயலிகளில் கால் டாக்ஸி ஓட்டுநர்களாக இணைந்து பிழைப்பு நடத்தி வருகின்றனர். அந்தவகையில் டெல்லியை சேர்ந்த ஹஜ்ரத் என்பவர், ஊபரில் இணைந்து சமீபத்தில் 50,000 பயணங்களை நிறைவு செய்துள்ளார். இதனையடுத்து ஊபர் நிறுவனம், தனது இன்ஸ்டாகிராம் பக்கத்தில் ஹஜ்ரத் பேசும் வீடியோ ஒன்றை பகிர்ந்துள்ளது.
அதில், மாதம் அதிகபட்சமாக 1 லட்சத்து 20 ஆயிரம் ரூபாய் வரை சம்பாதிப்பதாக ஹஜ்ரத் கூறியிருந்தார். இந்த வீடியோ இணையத்தில் வைரலான நிலையில், பட்டப்படிப்பை முடித்து மாதம் 30 முதல் 40 ஆயிரம் வரை சம்பாதிப்பதற்கே அல்லல்படுவதாக பலரும் கருத்து தெரிவித்தனர். அதே சமயம் ஹஜ்ரத் 1 லட்சம் ரூபாய் வரை சம்பாதிப்பது கால் டாக்ஸி ஓட்டும் இடத்தை பொறுத்தே அமைகிறது எனவும் சிலர் விளக்கமளித்தனர். எது எப்படியோ தொடர்ச்சியான உழைப்பால் முன்னேற்றம் காணும் ஹஜ்ரத் பாராட்டுக்குரியவர் என பலரும் கருத்து தெரிவித்துள்ளனர்.
