தேசமே முதன்மை என்ற உணர்வு அனைவரிடமும் இருக்க வேண்டும் : மோகன் பாகவத்

மகாராஷ்டிரா மாநிலம் நாக்பூரில், ஆர்எஸ்எஸ் நிறுவனர் ஹெட்கேவார் நினைவிடத்தில், ஆர்எஸ்எஸ் தலைவர் மோகன் பாகவத் மலரஞ்சலி செலுத்தினார்.

1925 ஆம் ஆண்டு விஜயதசமி திருநாளில் தான் ஆர்.எஸ்.எஸ் இயக்கம் ஹெட்கேவாரால் தொடங்கப்பட்டது. இதனையொட்டி, அமைப்பின் தொடக்க விழா மற்றும் விஜயதசமி விழாவை முன்னிட்டு மலரஞ்சலி செலுத்தப்பட்டது. இதனைதொடர்ந்து நடைபெற்ற நிகழ்வுகளிலும் மோகன் பாகவத் பங்கேற்றார்.

அப்போது பேசிய அவர், வேற்றுமையில் ஒற்றுமை என்பதே பாரதத்தின் சிறந்த பண்பு என்று  பெருமிதம் தெரிவித்தார்.

ஓடிடி தளங்களைக் கட்டுப்படுத்த சட்டத்திருத்தம் கொண்டுவர வேண்டும் என்றும், வளர்ந்த பாரதம் என்ற இலக்கை அடைய இளம் தலைமுறையினர் முன்வர வேண்டும் எனவும் கூறியுள்ளார்.

மேலும், சுரண்டலுக்கான கருவியாக ஏஐ மாறி விட்டதாக கவலை தெரிவித்த ஆமோகன் பாகவத், செயற்கை நுண்ணறிவு தொழில்நுட்பத்தை இளைஞர்கள் திறம்பட பயன்படுத்த வேண்டுமெனவும் அறிவுறுத்தினார்.

தேசமே முதன்மை என்ற உணர்வு அனைவரிடமும் இருக்க வேண்டும் என்றும், நாட்டின் பன்முகத்தன்மையை அனைவரும் மதிக்க வேண்டும் என்றும் கூறினார்.

உலகம் மிகவும் கடினமான சூழல்களை எதிர்கொண்டு வருகிறது என்றும், பல்வேறு சவால்களுக்கு மத்தியிலும் இந்தியா வளர்ச்சியை நோக்கி முன்னேறி வருகிறது என்றும் தெரிவித்தார்.

அடிமைத்தனத்தை எதிர்த்து நூற்றாண்டு காலமாக போராடினோம் என்றும், அதிகார போட்டிக்கான போர்கள் உலகை அழிவை நோக்கி இழுத்துச் செல்கின்றன என்றும் அவர் குறிப்பிட்டார்.

விவேகத்தை புதிய தலைமுறைக்கு கற்றுக்கொடுக்க வேண்டியது அவசியமாகும் என்றும், உலகம் முழுவதும் புதிய தலைமுறையினர் போதைப்பொருள் பழக்கத்திற்கு அடிமையாகி வருகின்றனர் என்றும் குறிப்பிட்டார்.

போதைப்பொருள் அடிமைத்தனம் ஒரு தீவிர தேசிய பிரச்சினை என்றும், இதை எதிர்கொள்ள சமூகமும், அரசாங்கமும் உரிய நடவடிக்கைகளை தொடங்க வேண்டும் என்றும் அவர் கூறினார்.