உத்தரப் பிரதேச மாநிலம் வாரணாசியில், விமானப்படையின் வான் சாகச நிகழ்ச்சியைப் பிரதமர் நரேந்திர மோடி கண்டுகளித்தார்.
இந்திய விமானப்படையின் 94-வது ஆண்டு விழாவில் பங்கேற்பதற்காகப் பிரதமர் மோடி வாரணாசிக்கு வருகை தந்தார். அப்போது, சாலையின் இருபுறமும் திரண்ட பாஜகவினரும் பொதுமக்களும் அவருக்கு உற்சாக வரவேற்பு அளித்தனர். பிரதமர் சென்ற கார் மீது மலர்களைத் தூவி வரவேற்ற நிலையில், அவர் கையசைத்து மகிழ்ச்சியை வெளிப்படுத்தினார்.
தொடர்ந்து, விமானப்படை ஆண்டுவிழாவையொட்டி ‘விங்ஸ் ஓவர் கங்கை’ வான்வழி சாகச நிகழ்ச்சி நடைபெற்றது. இதில் சிறப்பு விருந்தினராக பிரதமர் நரேந்திர மோடி கலந்துகொண்டு, விமானப்படையின் வான் சாகச நிகழ்ச்சியை கண்டு களித்தார். அப்போது கங்கை நதியின் மேல் ரஃபேல், தேஜஸ் உள்ளிட்ட 100-க்கும் மேற்பட்ட போர் விமானங்கள் மற்றும் ஹெலிகாப்டர்கள் சாகசத்தில் ஈடுபட்டன.
