கூட்டுறவு அங்காடியில் அமைச்சர்கள் இருக்கும் வரை சன்ன ரக அரிசி கொடுத்துவிட்டு, அமைச்சர் சென்ற பின்பு ரேஷன் அரிசியை பாலிஷ் செய்து கொடுப்பதாக பொதுமக்கள் குற்றம் சாட்டியுள்ளனர்.
தமிழகம் முழுவதும் கூட்டுறவு மற்றும் அமுதம் அங்காடிகள் மூலம் கிலோ 25 ரூபாய்க்கு, சன்ன ரக அரிசி விற்பனையை, சென்னை ராஜா அண்ணாமலைபுரம் பகுதியில் அமைச்சர்கள் வெங்கடரமணன், காந்திராஜ் ஆகியோர் தொடங்கி வைத்தனர். முதலில் 10 நபர்களுக்கு பைகளில் வைத்து 5 கிலோ சன்ன ரக அரிசியை அமைச்சர்களே வழங்கினர். முன்னதாக 5 கிலோ அரிசி வழங்கப்படும் என கூறி மக்களுக்கு டோக்கன் வழங்கப்பட்டதாக தெரிகிறது. சிறிது நேரத்தில் அரிசி தீர்ந்துவிட்டதாக கூறி, ஒருவருக்கு 3 கிலோ அரிசி மட்டும் தான் வழங்கப்படும் என கூறியதால் பொதுமக்கள் அதிருப்தி அடைந்தனர்.
மேலும், அமைச்சர்கள் இருக்கும் வரை சன்ன ரக அரிசி வழங்கியதாகவும், நிகழ்ச்சி முடிந்து அமைச்சர்கள் சென்ற பின் ரேஷன் அரிசியை பாலிஷ் போட்டு வழங்கியதாகவும் பொதுமக்கள் குற்றம் சாட்டியுள்ளனர்.
