ஆகஸ்ட் 8-ம் தேதி பாகிஸ்தான் நாடாளுமன்றம் கலைக்கப்படும் என அந்நாட்டு ஊடகங்கள் செய்திகள் வெளியிட்டுள்ளன.
பாகிஸ்தான் நாடாளுமன்றத்தின் பதவிக்காலம் வருகின்ற ஆகஸ்ட் 12-ம் தேதியோடு முடிவுக்கு வருகிறது. நாடாளுமன்றத் தேர்தல் பரபரப்பு அந்நாட்டில் அதிகரித்து நிலையில், தேர்தலுக்கு முன்பாக தற்போதைய நாடாளுமன்றம் கலைக்கப்படும் என்றும், ஆகஸ்ட் 8-ம் தேதி நாடாளுமன்றத்தைக் கலைக்க நாட்டின் மிக முக்கிய கட்சிகளான பாகிஸ்தான் முஸ்லிம் லீக் (நவாஸ்) கட்சியும், பாகிஸ்தான் மக்கள் கட்சியும் ஒப்புக்கொண்டதாகவும் அந்நாட்டு ஊடகங்கள் செய்தி வெளியிட்டுள்ளன.
இந்நிலையில், இது குறித்து செய்தியாளர்களிடம் பேசிய பாகிஸ்தான் தகவல் தொடர்பு அமைச்சர் மரியம் அவுரங்கசீப்,
“நாடாளுமன்றத்தைக் கலைக்கும் தேதி இன்னும் முடிவாகவில்லை, உரிய ஆலோசனைக்குப் பிறகு அதிகாரப்பூர்வமாக அரசு தனது முடிவை அறிவிக்கும்” என தெரிவித்துள்ளார்.
