குடியரசு தின விழாவில் நடைபெற்ற கண்கவர் கலை நிகழ்ச்சிகளை ஆளுநர் ஆர்.என்.ரவி, முதலமைச்சர் ஸ்டாலின் உள்ளிட்டோர் கண்டு ரசித்தனர்.
சென்னை கடற்கரை சாலையில், குடியரசு தினத்தையொட்டி பள்ளி, கல்லூரி மாணவர்களின் கண் கவர் கலைநிகழ்ச்சிகள் நடைபெற்றன. தமிழக கலை பண்பாட்டு துறை சார்பில் மயிலாப்பூர் பள்ளி மாணவிகளின் நாட்டிய நிகழ்ச்சி நடைபெற்றது. பஞ்சப்பூதங்களின் பெருமைகளை பறைசாற்றும் விதத்தில் மாணவிகள் ஆடிய நடனத்தை ஆளுநரும், முதலமைச்சரும் கண்டு ரசித்தனர்.
இதனை தொடர்ந்து சென்னை அசோக் நகர் அரசு பள்ளி மாணவிகள் கோலாட்டமாடி பார்வையாளர்களை கவர்ந்தனர்.சென்னை கொளத்தூர் எவர்வின் மெட்ரிக்ப்பள்ளி மாணவிகள் சார்பில் நாட்டிய நிகழ்ச்சி நடைபெற்றது. மாணவிகள் மயில்போன்று தோகை விரித்து நடனமாடி விருந்தினர்களை உற்சாகப்படுத்தினர்.
சென்னை ராணி மேரி அரசு கலைக் கல்லூரி மாணவிகளின் கண்ணை கவரும் கலை நிகழ்ச்சி நடைபெற்றது. தமிழின் பெருமைகளை பறைச்சாற்றிய மாணவிகள், நடனத்தின் மூலம் பாரதிதாசன் உருவத்தை அமைத்தனர்.
சென்னை குரோம்பேட்டை வைஷ்ணவா கல்லூரி மாணவிகள் தமிழர்களின் பாரம்பரிய நடனங்களை ஆடி அசத்தினர். கரகம் மற்றும் சிலம்பாட்டத்தின் பெருமைகளை நடனத்தின் மூலம் வெளிப்படுத்தினர்.
சென்னை அம்பத்தூர் சோகா இகேதா கல்லூரி மாணவிகளின் கண்ணை கவரும் நடன நிகழ்ச்சிகள் நடைபெற்றது. தஞ்சாவூர் தலையாட்டி பொம்மை, ஒயிலாட்டம் ஆகியவற்றின் சிறப்புகளை வெளிப்படுத்திய மாணவிகளின் நடனத்தை பார்வையாளர்கள் கண்டு ரசித்தனர்.
இதனை தொடர்ந்து, அசாம் மாநிலத்தின் பர்தோய் சிகாலா நடன நிகழ்ச்சி நடைபெற்றது. பாரம்பரிய இசைக்கு ஏற்ப பெண்கள் நடனமாடி அசத்தினர்.
குடியரசு தின விழாவில் தெலங்கானா நடன கலைஞர்களின் மாதுரி நடன நிகழ்ச்சி நடைபெற்றது. பழங்குடிகளின் கலாசாரத்தை பறைசாற்றும் விதமாக மாணவ, மாணவிகள் நடனமாடினர்.
ஜம்மு – காஷ்மீர் கலைஞர்களின் கண்கவர் ரூப் நடன நிகழ்ச்சி நடைபெற்றது. அறுவடைக் காலத்தின் பெருமைகளை குறிக்கும் வகையில் மாணவிகள் நடனமாடி பார்வையாளர்களை பரவசப்படுத்தினர்.
இதனை அடுத்து தமிழக செய்தி மற்றும் மக்கள் தொடர்புத்துறை சார்பில் நடன நிகழ்ச்சி நடைபெற்றது. இதில், தமிழர்களின் பாரம்பரிய கலைகளான ஒயிலாட்டம், கரகாட்டம், காவடி ஆட்டம் உள்ளிட்ட கிராமிய நடனங்களை ஆடி கலைஞர்கள் அசத்தினர்.
