திமுக முன்னாள் அமைச்சர் கே.என் தொடர்புடைய 19 இடங்களில் லஞ்ச ஒழிப்புதுறையினர் சோதனை நடத்தி வருகின்றனர்.
நகராட்சித் துறையில் 1020 கோடி ரூபாய் அளவுக்கு முறைகேடு நடந்ததாகவும், கே.என் நேரு, அவரது சகோதரர் உள்ளிட்ட நபர்கள் மீது நடவடிக்கை எடுக்குமாறும், கடந்த டிசம்பர் மாதம் அமலாக்கத்துறை அதிகாரிகள் தமிழக டி.ஜி.பி மற்றும் தலைமைச் செயலாளருக்கு கடிதம் அனுப்பியிருந்தனர்.
அதன்படி டெண்டர் முறைகேட்டில் ஈடுபட்டது, டெண்டரில் முறைகேடாக கட்சி நிதி வாங்கியது தொடர்பாக கே.என் நேரு, அவரது சகோரதரர் ரவிச்சந்திரன் உள்ளிட்ட 12 நபர்கள் மீது லஞ்ச ஒழிப்புத்துறை வழக்குப்பதிவு செய்துள்ளதாக தகவல் வெளியானது.
அதனடிப்படையில் திமுக முன்னாள் அமைச்சர் கே.என்.நேரு. அவரது சகோதரர் ரவிச்சந்திரன் தொடர்புடைய இடங்களில் இன்று காலை முதல் லஞ்ச ஒழிப்புத்துறை போலீசார் சோதனை நடத்தி வருகின்றனர். சென்னை, திருச்சி, அடையாறு, திருவான்மியூர் என 19 இடங்களிலும் சோதனை நடைபெற்று வருகிறது.
இதேபோன்று, திருச்சி தில்லை நகரில் உள்ள தி.மு.க. முன்னாள் அமைச்சர் நேரு வீட்டில் லஞ்ச ஒழிப்பு துறை போலீசார் சோதனை நடத்தினர். அப்போது ஏற்கனவே பதியப்பட்ட வழக்குகள் தொடர்பாகவும், சோதனை தொடர்பாகவும், கே.என்.நேருவிடம் லஞ்ச ஒழிப்புத்துறை அதிகாரிகள் விசாரணை மேற்கொண்டதாக தகவல் வெளியாகியுள்ளது.
கே என் நேரு தொடர்புடைய இடங்களில் லஞ்ச ஒழிப்புத்துறையினர் சோதனை மேற்கொண்டு வரும் அதே வேளையில் கோவை சிங்காநல்லூர் டி.வி.எஸ். அபார்ட்மெண்டிலும் லஞ்ச ஒழிப்புத்துறை அதிகாரிகள் அதிரடி சோதனை மேற்கொண்டனர்.
