ஓய்வுபெற்ற நீதிபதி குரியன் ஜோசப் தலைமையிலான குழுவை கலைத்து தமிழக அரசு உத்தரவிட்டுள்ளது.
மத்திய – மாநில அரசுகளின் உறவுகள் பற்றி ஆராய்ந்து பரிந்துரைகளை வழங்க முந்தைய திமுக ஆட்சியில் ஓய்வுபெற்ற உச்சநீதிமன்ற நீதிபதி குரியன் ஜோசப் தலைமையில் உயர்மட்ட குழு அமைக்கப்பட்டது.
இந்தக் குழு தனது முதல் ஆய்வறிக்கையை கடந்த பிப்ரவரி 16 ஆம் தேதி அப்போதைய முதலமைச்சர் ஸ்டாலினிடம் சமர்ப்பித்தது.
இந்நிலையில், ஆட்சி மாற்றம் ஏற்பட்டதை தொடர்ந்து குரியன் ஜோசப் குழுவை கலைத்து விஜய் தலைமையிலான தமிழக அரசு அரசாணை வெளியிட்டுள்ளது.
மத்திய – மாநில அரசுகளின் உறவுகள் தொடர்பான இந்த குழு சட்டப்பூர்வமாக உருவாக்கப்பட்ட அமைப்பு அல்ல எனவும்
ஆகஸ்ட் 7 ஆம் தேதி மறுசீரமைக்கப்பட்ட மாநில சட்ட ஆணையத்தின் பணிகளுக்கும் குழுவின் பணிகளுக்கும் இடையே ஒற்றுமை இருப்பதால் கலைக்கப்படுவதாகவும் விளக்கம் அளிக்கப்பட்டுள்ளது.
மேலும், மத்திய – மாநில அரசுகளின் உறவுகள் தொடர்பான விவகாரங்களை இனி மாநில சட்ட ஆணையமே நேரடியாகக் கவனிக்கும் எனவும் தமிழக அரசு தெரிவித்துள்ளது.
