மேகாலயா மாநிலம் ஜெயின்டியா மலைப்பகுதியில் நிலச்சரிவு ஏற்பட்டதில், ஒரே குடும்பத்தைச் சேர்ந்த 4 பேர் இடிபாடுகளில் சிக்கி உயிரிழந்தனர்.
மேகாலயாவின் மேற்கு ஜெயின்டியா மலைப்பகுதியில் உள்ள பைந்தோர்லாங்டைன் பகுதியில் ஞாயிற்றுக் கிழமை பெய்த தொடர் மழை காரணமாக நிலச்சரிவு ஏற்பட்டது.
இந்த நிலச்சரிவில் அப்பகுதியிலிருந்த வீடு ஒன்று இடிந்து விழுந்துள்ளது. இதில் வீட்டிலிருந்த இரண்டு சிறுவர்கள் உட்பட ஒரே குடும்பத்தைச் சேர்ந்த 4 பேர் இடிபாடுகளில் சிக்கி உயிருடன் புதைந்தனர்.
இந்த சம்பவம் குறித்து அப்பகுதி மக்கள் காவல்துறைக்குத் தகவல் கொடுத்தனர். தகவலின் பேரில் விரைந்து வந்த காவல்துறையினர் மீட்பு பணியில் ஈடுபட்டனர்.
பல மணி நேரப் போராட்டத்திற்குப் பிறகு வீடு இடிபாடுகளில் சிக்கி இருந்த நான்கு பேரின் உடல்களையும் காவல்துறை மீட்டனர். இதைத்தொடர்ந்து, உயிரிழந்தவர்களின் உடல்களைப் பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர்.
இச்சம்பவத்தில் சிக்கி உயிரிழந்தவர்களின் உறவினர்களுக்கு மாநில அரசு நிவாரண நிதி வழங்கி உள்ளதாக மேகாலயா டிஜிபி தெரிவித்துள்ளார்.
நிலச்சரிவில் சிக்கி ஒரே குடும்பத்தைச் சேர்ந்த 4 பேர் உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.
